શિરડી: Shirdi Sai Baba Templeમાં ભક્તોને વેચાતા પ્રસાદના પેંડાને લઈને મોટો વિવાદ સામે આવ્યો છે. અન્ન અને ઔષધ નિયમન વિભાગે હાથ ધરેલી વિશેષ તપાસ દરમિયાન ભેળસેળયુક્ત અને હલકી ગુણવત્તાના પેંડાનો મોટો જથ્થો ઝડપી પાડ્યો હતો. કાર્યવાહી દરમિયાન અંદાજે 700 કિલો જેટલા શંકાસ્પદ પેંડાનો નાશ કરવામાં આવ્યો છે.
અધિકારીઓને છેલ્લા કેટલાક સમયથી પેંડાની ગુણવત્તા અંગે ફરિયાદો મળી રહી હતી. ફરિયાદોના આધારે વહીવટી તંત્ર, પોલીસ, નગરપાલિકા અને અન્ન-ઔષધ વિભાગની સંયુક્ત ટીમે શિરડીની વિવિધ દુકાનો અને ઉત્પાદન એકમો પર અચાનક દરોડા પાડ્યા હતા.
તપાસ દરમિયાન કેટલાક સ્થળોએ હલકી ગુણવત્તાના માવાનો ઉપયોગ કરીને પેંડા તૈયાર કરવામાં આવતા હોવાની વિગતો સામે આવી હતી. ભક્તોના આરોગ્યને જોખમમાં મૂકે તેવા આ જથ્થાને તાત્કાલિક જપ્ત કરીને નિયમ મુજબ નાશ કરવામાં આવ્યો હતો.
શિરડી દેશ-વિદેશના કરોડો શ્રદ્ધાળુઓની આસ્થાનું કેન્દ્ર છે. દરરોજ હજારો ભક્તો મંદિરની મુલાકાત લઈને પ્રસાદ સ્વરૂપે પેંડાની ખરીદી કરતા હોય છે. આવા સમયે પ્રસાદની ગુણવત્તા અંગેનો આ ખુલાસો ચોંકાવનારો માનવામાં આવી રહ્યો છે.
અધિકારીઓએ જણાવ્યું છે કે ભક્તોના આરોગ્ય સાથે કોઈપણ પ્રકારનું સમાધાન કરવામાં આવશે નહીં. ભવિષ્યમાં પણ નિયમિત ચકાસણી અને સઘન નિરીક્ષણ હાથ ધરવામાં આવશે તેમજ ભેળસેળ કરનારાઓ સામે કડક કાયદાકીય કાર્યવાહી કરવામાં આવશે.
આ કાર્યવાહી બાદ શિરડીના વેપારીઓમાં ફફડાટ ફેલાયો છે, જ્યારે ભક્તોમાં પ્રસાદની ગુણવત્તા અંગે વધુ જાગૃતિ જોવા મળી રહી છે.
