ક્રાઇમ બ્રાન્ચ પર હથિયાર ઉગામવું ભારે પડ્યું: 26 ગુનામાં મોસ્ટ વોન્ટેડ કુખ્યાત ‘ધમો બારડ’ પોલીસ શૂટઆઉટમાં ઢેર, પગમાં ધરબી દીધી ગોળી!

કૃષ્ણનગર પોલીસ સ્ટેશનમાં નોંધાયેલા હત્યાના પ્રયાસના ગુનામાં વોન્ટેડ એવો અત્યંત કુખ્યાત અને નામી આરોપી, ધર્મેન્દ્ર સિંહ ઉર્ફે ધામો (પિતાનું નામ અભેસિંહ જવાનસિંહ, જ્ઞાતિ બારડ) ની ધરપકડ કરવામાં આવી છે. ક્રાઈમ બ્રાન્ચ દ્વારા હાથ ધરવામાં આવેલા ધરપકડના ઓપરેશન દરમિયાન આરોપીએ પોલીસ કર્મચારીઓ પર હુમલો કરવાનો પ્રયાસ કર્યો હતો. આ દરમિયાન થયેલી ઝપાઝપીમાં પિસ્તોલમાંથી ગોળી છૂટતા તેના પગમાં ઈજા થઈ હતી. ત્યારબાદ તેને સફળતાપૂર્વક કાબૂમાં લેવામાં આવ્યો હતો.

આરોપીને પકડવા માટે પોલીસનું ફાયરિંગ

અમદાવાદમાં ક્રાઈમ બ્રાન્ચે લાંબા સમયથી વોન્ટેડ આરોપી ધમા બારડને પકડવા માટે મોટી કાર્યવાહી હાથ ધરી હતી. હત્યાના પ્રયાસ સહિતના ગંભીર ગુનામાં ફરાર રહેલા આરોપીને પકડવા જતા ઘટના હિંસક બની હતી અને અંતે પોલીસને ફાયરિંગ કરવું પડ્યું હતું. જણાવી દઇએ કે, આરોપીનો ગુનાહિત ઇતિહાસ ઘણો મોટો છે. જેમાં વિવિધ પોલીસ સ્ટેશનોમાં 26 નોંધાયેલા ગુનાઓ સામેલ છે. જેમાં હત્યા, હત્યાનો પ્રયાસ, ખંડણી (તોડબાજી), ધાડ, રમખાણો (રાયોટિંગ) તેમજ આર્મ્સ એક્ટ (હથિયાર ધારો) અને પ્રોહિબિશન એક્ટ (દારૂબંધી ધારો) ના ઉલ્લંઘન જેવા ગંભીર ગુનાઓનો સમાવેશ થાય છે.

ધરપકડ દરમિયાન શું થયું?

પોલીસ ટીમ જ્યારે આરોપી ધમા બારડને પકડવા પહોંચી ત્યારે તેણે પ્રતિકાર કર્યો હોવાનું જાણવા મળ્યું છે. આરોપીએ પોલીસ પર હુમલો કરવાનો પ્રયાસ કર્યો હતો અને હાથમાં પિસ્તોલ હોવાની સ્થિતિમાં પરિસ્થિતિ વધુ ગંભીર બની ગઈ હતી. પરિસ્થિતિ કાબૂ બહાર જતી જોઈને પોલીસે બચાવ માટે નિશાન સાધીને ફાયરિંગ કર્યું. આ દરમિયાન આરોપીના પગમાં ગોળી વાગી હતી અને ત્યારબાદ તેને કાબૂમાં લેવામાં આવ્યો હતો. ઘટના બાદ આરોપીને તાત્કાલિક હોસ્પિટલમાં ખસેડવામાં આવ્યો હતો. જ્યાં તેનું સારવાર હેઠળ હોવાનું જણાવાયું છે.