વિયેતનામની રાજધાની હનોઈ પહોંચવા પર ભારતના સંરક્ષણ મંત્રી રાજનાથ સિંહે ત્યાંના રાષ્ટ્રીય સંરક્ષણ મંત્રી જનરલ ફાન વાન જિયાંગ સાથે મંત્રી સ્તરની દ્વિપક્ષીય બેઠક યોજી હતી. વિયેતનામના રાષ્ટ્રપતિ તો લામની નવી દિલ્હી મુલાકાત દરમિયાન બંને દેશોએ પોતાના સંબંધોને ‘વ્યાપક વ્યૂહાત્મક ભાગીદારી’ (Comprehensive Strategic Partnership) ના સ્તર સુધી વધાર્યાના ગણતરીના દિવસોમાં જ સંરક્ષણ મંત્રી રાજનાથ સિંહનો આ વિયેતનામ પ્રવાસ થઈ રહ્યો છે.
આ મુલાકાતનો મુખ્ય ઉદ્દેશ્ય સૈન્ય ઉપકરણોના સંયુક્ત ઉત્પાદન સહિત વ્યૂહાત્મક સંરક્ષણ સહયોગને મજબૂત કરવાના ઉપાયો પર ચર્ચા કરવાનો છે. વિયેતનામની રાજધાની હનોઈ રવાના થતા પહેલા રાજનાથ સિંહે જણાવ્યું હતું કે, આ એશિયાઈ દેશોની તેમની મુલાકાતનો મુખ્ય હેતુ સંરક્ષણ ઔદ્યોગિક ભાગીદારીને મજબૂત કરવાનો, દરિયાઈ સહયોગને પ્રોત્સાહન આપવાનો અને હિંદ-પ્રશાંત (ઇન્ડો-પેસિફિક) ક્ષેત્રમાં શાંતિ અને સ્થિરતા વધારવાનો રહેશે.
અહીંથી દક્ષિણ કોરિયાની મુલાકાતે જશે
વિયેતનામનો પ્રવાસ પૂર્ણ કર્યા બાદ સંરક્ષણ મંત્રી મંગળવારે ત્રણ દિવસીય મુલાકાતે દક્ષિણ કોરિયા જશે. આ પ્રવાસ દરમિયાન બંને પક્ષો દક્ષિણ ચીન સાગર (દક્ષિણ ચાઇના સી) ની વર્તમાન સ્થિતિ અંગે પણ ચર્ચા કરશે. ઉલ્લેખનીય છે કે, આ વિસ્તારમાં તાજેતરના વર્ષોમાં ચીનની સૈન્ય પ્રવૃત્તિઓમાં મોટો વધારો થયો છે.
દક્ષિણ ચીન સાગર અંગે વધતી ચિંતા:
-
હાઇડ્રોકાર્બનના વિશાળ સ્ત્રોત ગણાતા દક્ષિણ ચીન સાગર પર ચીનના વ્યાપક સાર્વભૌમત્વના દાવાઓને કારણે વૈશ્વિક ચિંતાઓ સતત વધી રહી છે.
-
આ ક્ષેત્રના અન્ય દેશો જેમ કે વિયેતનામ, ફિલિપાઇન્સ અને બ્રુનેઇ દ્વારા પણ દક્ષિણ ચીન સાગર પર પોતપોતાના અલગ-અલગ દાવા કરવામાં આવે છે.
