લીતાણાની સદવિચાર હોસ્પિટલમાં આયુષ્યમાન કાર્ડ વિવાદમાં ભારે ધમાલ, ડોક્ટરો સામે લૂંટ, ધમકી અને એટ્રોસિટીની ફરિયાદ
ભાવનગર જિલ્લાના પાલીતાણા સ્થિત સદવિચાર હોસ્પિટલમાં આયુષ્માન કાર્ડ હેઠળની સારવારમાં વધારાના નાણાં વસૂલવા બાબતે ચાલી રહેલા વિવાદે આજે ઉગ્ર સ્વરૂપ ધારણ કર્યું હતું. દર્દીના સગા અને સ્થાનિક કોર્પોરેટર વચ્ચે થયેલી વાટાઘાટો દરમિયાન હોસ્પિટલના તબીબો અને મેનેજર દ્વારા બોલાચાલી બાદ લૂંટ, જાનથી મારી નાખવાની ધમકી તેમજ જાતિ વિષયક અપમાનજનક શબ્દો ઉચ્ચારવામાં આવ્યા હોવાના ગંભીર આક્ષેપો સાથે પાલીતાણા ટાઉન પોલીસ સ્ટેશનમાં ગુનો નોંધાયો છે.
ઘટનાની મુખ્ય વિગતો અને આક્ષેપો:
-
આયુષ્માન કાર્ડ છતાં નાણાં વસૂલવાનો વિવાદ: ગણેશનગરના રહીશ અને વોર્ડ નં. ૧ ના કોર્પોરેટર કિરીટભાઈ શામજીભાઈ સાગઠીયાના કૌટુંબિક કાકીના ઓપરેશન વખતે આયુષ્માન કાર્ડ હોવા છતાં હોસ્પિટલ દ્વારા વધારાના નાણાં વસૂલવામાં આવ્યા હતા. આ મામલે જિલ્લા આરોગ્ય અધિકારીને રજૂઆત કર્યા બાદ કોર્પોરેટર અને તેમના સાથીઓ હોસ્પિટલ ખાતે વાતચીત કરવા ગયા હતા.
-
મોબાઈલની લૂંટ અને જાતિ વિષયક અપમાન: વાતચીત દરમિયાન ઉગ્ર બોલાચાલી થઈ હતી. બચાવ અને પુરાવા રૂપે વિડીયો શૂટિંગ કરી રહેલા સાથીઓના હાથમાંથી આશરે રૂ. ૬૭,૦૦૦ ની કિંમતના બે મોંઘા મોબાઈલ ફોન (મોટોરોલા અને આઈફોન) ઝૂંટવી લેવામાં આવ્યા હોવાનો ફરિયાદમાં આક્ષેપ કરાયો છે. આ ઉપરાંત ડોક્ટરો અને મેનેજરે એકસંપ થઈ જાનથી મારી નાખવાની ધમકી આપી જાતિ પ્રત્યે અપમાનિત કર્યા હતા.
-
પોલીસ કાર્યવાહી: પાલીતાણા ટાઉન પોલીસે ડો. દામજીભાઈ છોટાલા, ડો. વાળા, ડો. ચૌહાણ અને મેનેજર જયપાલભાઈ સામે એટ્રોસિટી એક્ટ અને લૂંટ-ધમકી સહિતની કલમો હેઠળ ગુનો દાખલ કર્યો છે. આ કેસની આગળની તપાસ નાયબ પોલીસ અધીક્ષક (DySP) મિહીરકુમાર બારીયાને સોંપવામાં આવી છે.
