નવી દિલ્હી: દેશભરમાં ચોમાસું હવે સતત આગળ વધી રહ્યું છે અને આગામી થોડા દિવસોમાં ઉત્તર ભારતના અનેક રાજ્યોમાં વરસાદી માહોલ જામવાની શક્યતા છે. ભારતીય હવામાન વિભાગ (IMD)ના અનુમાન મુજબ, આગામી 3થી 4 દિવસમાં ઉત્તર પ્રદેશ, રાજસ્થાન અને ઉત્તરાખંડના મોટા ભાગના વિસ્તારોમાં ચોમાસું સત્તાવાર રીતે પ્રવેશ કરશે.
હાલમાં ચોમાસું ગુજરાત, મધ્ય પ્રદેશ, છત્તીસગઢ, ઝારખંડ અને બિહારને સંપૂર્ણપણે આવરી ચૂક્યું છે. હવે તેની સક્રિય રેખા ઉત્તર દિશામાં આગળ વધી રહી હોવાથી ઉત્તર ભારતના વિસ્તારોમાં પણ વરસાદી ગતિવિધિઓ તેજ બનવાના સંકેતો મળી રહ્યા છે.
હવામાન વિભાગે પૂર્વીય રાજસ્થાન માટે 27 જૂનથી 1 જુલાઈ દરમિયાન ગાજવીજ, તેજ પવન અને હળવાથી મધ્યમ વરસાદની આગાહી કરી છે. કેટલાક વિસ્તારોમાં 50થી 60 કિમી પ્રતિ કલાકની ઝડપે પવન ફૂંકાઈ શકે છે, જેને કારણે લોકોને સાવચેતી રાખવાની સલાહ આપવામાં આવી છે.
ઉત્તરાખંડમાં આ વર્ષે ચોમાસાનું આગમન સામાન્ય સમય કરતાં મોડું થઈ રહ્યું છે. જોકે, 28 જૂનથી વરસાદનું જોર વધવાની અને 29 જૂને કુમાઉ વિસ્તાર સહિત અનેક સ્થળોએ ભારે વરસાદ પડવાની શક્યતા વ્યક્ત કરવામાં આવી છે.
ઉત્તર પ્રદેશમાં પણ આગામી દિવસોમાં હવામાનમાં મોટો ફેરફાર જોવા મળશે. પશ્ચિમ વિસ્તારમાં હળવા વરસાદની શરૂઆત થશે, જ્યારે પૂર્વીય જિલ્લાઓમાં 30 જૂન અને 1 જુલાઈ દરમિયાન ભારે વરસાદ માટે એલર્ટ જાહેર કરવામાં આવ્યું છે.
હવામાન નિષ્ણાતોના જણાવ્યા અનુસાર, ચોમાસાની ગતિ સતત અનુકૂળ રહેતાં આગામી દિવસોમાં દેશના બાકીના વિસ્તારો પણ વરસાદથી તરબતર થશે. વરસાદ શરૂ થતાં ગરમી અને હીટવેવથી લોકોને રાહત મળશે, જ્યારે ખેડૂતો માટે પણ આ વરસાદ લાભદાયી સાબિત થવાની આશા છે.
