નવી દિલ્હી: ભારતીય શેરબજારમાં પ્રાથમિક બજાર (IPO) ફરી એકવાર ગતિ પકડવા જઈ રહ્યું છે. છેલ્લા કેટલાક સમયથી ધીમી રહેલી IPO પ્રવૃત્તિ હવે જુલાઈ મહિનાથી ફરી તેજ બનવાની સંભાવના છે. બજારની સ્થિતિ અનુકૂળ બનતાં 12થી વધુ કંપનીઓ લિસ્ટિંગ માટે તૈયાર થઈ ગઈ છે અને કુલ મળીને આશરે ₹45,000 કરોડ એકત્ર કરવાની યોજના બનાવી રહી છે.
બજારના સૂત્રોના જણાવ્યા મુજબ, જુલાઈમાં સૌથી મોટો IPO SBI Funds Managementનો હોઈ શકે છે, જેનું કદ અંદાજે ₹12,000થી ₹13,000 કરોડ રહેશે. ત્યારબાદ Manipal Health Enterprisesનો લગભગ ₹11,000 કરોડ અને ક્વિક-કોમર્સ કંપની Zeptoનો આશરે ₹8,000 કરોડનો IPO આવવાની સંભાવના છે. આ ત્રણ મોટા IPO જ મળીને લગભગ ₹32,000 કરોડનું ભંડોળ ઊભું કરશે.
આ સિવાય Mega Capital, NAC Packaging અને Innovative View સહિત અનેક કંપનીઓ પણ શેરબજારમાં પ્રવેશવાની તૈયારીમાં છે. માર્કેટ નિષ્ણાતોનું માનવું છે કે વૈશ્વિક સ્થિતિમાં સુધારો અને સ્થાનિક રોકાણકારોના મજબૂત વિશ્વાસને કારણે IPO માટેનું વાતાવરણ ફરી અનુકૂળ બન્યું છે.
જેએમ ફાઇનાન્શિયલના એમડી અને સીઈઓ સોનિયા દાસગુપ્તાના જણાવ્યા મુજબ, વૈશ્વિક અનિશ્ચિતતા ધીમે-ધીમે ઘટી રહી છે અને ભારતીય અર્થતંત્ર પ્રત્યે રોકાણકારોનો વિશ્વાસ સતત વધી રહ્યો છે, જેના કારણે આગામી મહિનાઓમાં IPO માર્કેટ વધુ સક્રિય બનશે.
વર્ષની શરૂઆતમાં પશ્ચિમ એશિયાના તણાવ, વિદેશી રોકાણમાં ઘટાડો અને બજારમાં અસ્થિરતાના કારણે IPOની ગતિ ધીમી પડી હતી. એપ્રિલ સુધી 18 IPO આવ્યા હતા, જ્યારે મે મહિનામાં એક પણ નવી કંપની લિસ્ટ થઈ નહોતી. હવે સ્થિતિ બદલાતાં ફરીથી કંપનીઓ IPO લોન્ચ કરવા ઉત્સુક બની છે.
સેબી (SEBI)ના તાજેતરના આંકડા મુજબ, 173 કંપનીઓને કુલ ₹2.7 લાખ કરોડ એકત્ર કરવા મંજૂરી મળી ચૂકી છે, જ્યારે 64 અન્ય કંપનીઓ હજુ મંજૂરીની રાહ જોઈ રહી છે. તેમાં NSE અને Jio Platforms જેવા મેગા IPO પણ સામેલ હોવાથી આગામી મહિનાઓમાં ભારતીય IPO બજાર વધુ ગરમાય તેવી શક્યતા વ્યક્ત કરવામાં આવી રહી છે.
