અંજાર: કચ્છના અંજારમાં દારૂની હેરાફેરી માટે અપનાવવામાં આવેલી નવી તરકીબનો પોલીસે પર્દાફાશ કર્યો છે. બંગડીના પાર્સલ તરીકે મોકલાયેલા માલમાંથી વિદેશી દારૂનો મોટો જથ્થો મળી આવતાં સમગ્ર મામલો ચર્ચાનો વિષય બન્યો છે.
પોલીસને મળેલી ચોક્કસ બાતમીના આધારે કચ્છ હાઇવે ટ્રાન્સપોર્ટના ગોડાઉનમાં દરોડો પાડવામાં આવ્યો હતો. તપાસ દરમિયાન એક શંકાસ્પદ પાર્સલની ચકાસણી કરવામાં આવી હતી. પાર્સલના દસ્તાવેજોમાં કાચની બંગડીઓ હોવાનું દર્શાવવામાં આવ્યું હતું, પરંતુ જ્યારે પાર્સલ ખોલવામાં આવ્યું ત્યારે અંદરથી વિદેશી દારૂની બોટલો મળી આવી હતી.
પોલીસે સ્થળ પરથી અંદાજે રૂ. 1.63 લાખની કિંમતનો વિદેશી દારૂ કબ્જે કર્યો હતો. કાર્યવાહી દરમિયાન હિંમત જોઇસર, ઉદય માતંગ અને હુશેન શેખડાડા નામના ત્રણ શખ્સોને ઝડપી લેવામાં આવ્યા હતા.
પ્રાથમિક તપાસમાં સામે આવ્યું છે કે આ માલ રાજસ્થાનના જોધપુરથી “ઉષા બેંગલ્સ” નામે મોકલવામાં આવ્યો હતો. જો કે, માલ મોકલનાર મુખ્ય આરોપી હાલ ફરાર છે અને તેને ઝડપી પાડવા માટે પોલીસે તપાસનો ધમધમાટ શરૂ કર્યો છે.
પોલીસ હવે આ હેરાફેરી પાછળ કોઈ મોટું નેટવર્ક કાર્યરત છે કે કેમ તેની તપાસ કરી રહી છે. સાથે જ અગાઉ પણ આવી જ પદ્ધતિથી દારૂની હેરાફેરી કરવામાં આવી હતી કે નહીં તે દિશામાં પણ તપાસ આગળ વધારવામાં આવી રહી છે.
આ સફળ કાર્યવાહીને પગલે જિલ્લામાં ગેરકાયદે દારૂના ધંધા સાથે સંકળાયેલા તત્વોમાં ફફડાટ ફેલાયો છે. પોલીસે સ્પષ્ટ કર્યું છે કે કાયદા વિરુદ્ધની કોઈપણ પ્રવૃત્તિ સામે કડક કાર્યવાહી ચાલુ રહેશે.
