“રક્તદાન કરો – જીવન બચાવો” ના ઉમદા ઉદ્દેશ્ય સાથે, આજે વિશ્વ રક્તદાતા દિવસ નિમિત્તે ફતેપુરા ખાતે એક વિશાળ ‘મહા રક્તદાન કેમ્પ’નું આયોજન કરવામાં આવ્યું છે. ફતેપુરાના સ્થાનિક તંત્ર, આરોગ્ય વિભાગ અને સેવાભાવી સંગઠનોના સંયુક્ત ઉપક્રમે આયોજિત આ કેમ્પમાં માનવસેવાના યજ્ઞમાં સહભાગી થવા માટે નગરજનો મોટી સંખ્યામાં ઉમટી પડ્યા છે.
તારીખ: ૧૪ જૂન, ૨૦૨૬ (રવિવાર)
સમય: સવારે ૦૯:૦૦ થી બપોરે ૦૨:૦૦ કલાક સુધી
સ્થળ: સામુહિક આરોગ્ય કેન્દ્ર (CHC), ફતેપુરા
સહયોગ: તાલુકા આરોગ્ય વિભાગ, ફતેપુરા અને સાર્વજનિક બ્લડ સેન્ટર, સંતરામપુર (બ્લડ બેંક પાર્ટનર).
આયોજકો દ્વારા રક્તદાન પ્રત્યે જાગૃતિ વધારવા અને દાતાઓને પ્રોત્સાહિત કરવા માટે વિશેષ વ્યવસ્થાઓ કરવામાં આવી છે. દરેક રક્તદાતાને પ્રમાણપત્ર અને સ્મૃતિચિહ્ન આપીને સન્માનિત કરવામાં આવી રહ્યા છે. આ ઉપરાંત, મહિલા રક્તદાતાઓ માટે ખાસ અને સુરક્ષિત વ્યવસ્થા કરવામાં આવી છે, જેથી તેઓ સુવિધાજનક રીતે રક્તદાન કરી શકે.
આ સેવાકીય કાર્યને સફળ બનાવવામાં વિશાલ નાહર, હર્ષદ પંચાલ, મનોજ કલાલ, હાતિમ વોહરા, ડૉ. ઝુબેર ભાભોર અને અજીજ સાઠિયાની ટીમે મહત્વની ભૂમિકા ભજવી છે. આયોજકોએ જણાવ્યું હતું કે, “રક્તદાન એ શ્રેષ્ઠ દાન છે. તમારું એક યુનિટ રક્ત કોઈના જીવનને નવી આશા અને નવજીવન આપી શકે છે.”
સમગ્ર ફતેપુરામાં આ આયોજનને લઈને ભારે ઉત્સાહ જોવા મળી રહ્યો છે અને સવારથી જ મોટી સંખ્યામાં સ્વયંસેવકો રક્તદાન કરી રહ્યા છે. આયોજકોએ તમામ નાગરિકોને આ મહાયજ્ઞમાં જોડાઈને આ કાર્યને સફળ બનાવવા હાર્દિક અનુરોધ કર્યો છે.
રિપોર્ટર: યાસીર ગુડાલા, દાહોદ
