અમદાવાદ: શહેરમાં બેફામ દોડતા વાહનો જાણે યમદૂત બન્યા હોય તેમ અલગ-અલગ વિસ્તારોમાં સર્જાયેલા અકસ્માતોમાં ત્રણ લોકોએ પોતાના જીવ ગુમાવ્યા છે. અમદાવાદ પશ્ચિમ અને પૂર્વ વિસ્તારમાં બનેલી આ ઘટનાઓને પગલે ટ્રાફિક પોલીસે ગુના નોંધી વધુ તપાસ હાથ ધરી છે.
ઘટના ૧: સનાથલ પાસે ડમ્પરચાલકે વૃદ્ધને કચડ્યા, પત્ની ઘાયલ
એસપી રિંગ રોડ પર સનાથલ નજીક ગુરુવારે (11 જૂન) એક ભયાનક હિટ એન્ડ રનની ઘટના સામે આવી છે.
-
સાણંદમાં નિવૃત્ત જીવન જીવતા 77 વર્ષીય પ્રહલાદજી ઠાકોર તેમની પત્ની કાળીબેન સાથે એક્ટિવા પર બાંકરોલ ગામ તરફ જઈ રહ્યા હતા.
-
સનાથલ-બાકરોલ રોડ પર પહોંચતા જ પાછળથી પૂરપાટ ઝડપે આવી રહેલા એક આઈવા ડમ્પર ચાલકે તેમની એક્ટિવાને જોરદાર ટક્કર મારી હતી.
-
ટક્કર એટલી ગંભીર હતી કે ડમ્પરનું ટાયર પ્રહલાદજી પર ફરી વળતાં તેમનું ઘટનાસ્થળે જ કમકમાટીભર્યું મોત નીપજ્યું હતું.
અકસ્માત સર્જીને ડમ્પર ચાલક વાહન સાથે ફરાર થઈ ગયો હતો. ઈજાગ્રસ્ત કાળીબેનને તાત્કાલિક સારવાર માટે હોસ્પિટલ ખસેડાયા છે. આ મામલે ‘એમ’ ડિવિઝન ટ્રાફિક પોલીસે ગુનો નોંધી ડમ્પર ચાલકની શોધખોળ શરૂ કરી છે.
ઘટના ૨: સરખેજ નજીક સ્કૂલ બસની ટક્કરે ૨૮ વર્ષીય યુવકનું મોત
એસપી રિંગ રોડ પર સરખેજ નજીક ગઈકાલે બનેલા બીજા એક અકસ્માતમાં એક ચાર્ટર્ડ કંપનીની સ્કૂલ બસે રસ્તો પસાર કરી રહેલા 28 વર્ષીય અજાણ્યા યુવકને અડફેટે લીધો હતો.
-
બસની ટક્કરથી યુવક રોડ પર પટકાયો હતો અને ગંભીર ઈજાઓ થતાં સારવાર દરમિયાન તેનું મોત નીપજ્યું હતું.
-
અકસ્માત બાદ બસ ચાલક અવેશ આસીકભાઈ મોકમજીવાલા માનવતા દાખવી ઈજાગ્રસ્ત યુવકને પોતે જ હોસ્પિટલ લઈ ગયો હતો અને બાદમાં પોલીસ સ્ટેશને હાજર થયો હતો.
-
પોલીસે બસ ચાલક વિરૂદ્ધ ગુનો નોંધી મૃતક યુવકની ઓળખ મેળવવાના ચક્રો ગતિમાન કર્યા છે.
