ગાંધીનગર: ગુજરાત સરકારના શિક્ષણ વિભાગ દ્વારા દર વર્ષે યોજાતા રાજ્યવ્યાપી ‘શાળા પ્રવેશોત્સવ’ને લઈને એક મોટા સમાચાર સામે આવ્યા છે. વહીવટી કારણોસર સરકાર દ્વારા શાળા પ્રવેશોત્સવની પૂર્વ નિર્ધારિત તારીખોમાં ફેરફાર કરવામાં આવ્યો છે.
નવા સત્તાવાર નિર્ણય અનુસાર, હવે આ શૈક્ષણિક મહોત્સવ આગામી 23 જૂનથી 25 જૂન દરમિયાન યોજાશે. અગાઉ આ કાર્યક્રમ 18 જૂનથી 20 જૂન દરમિયાન યોજાવાનો હતો, પરંતુ હવે નવી તારીખો જાહેર થતાં શિક્ષણ વિભાગે તે મુજબ નવેસરથી તડામાર તૈયારીઓ શરૂ કરી દીધી છે.
અધિકારીઓ માટે કડક ગાઇડલાઇન: સરકારી વાહનો પર પ્રતિબંધ!
તારીખોના ફેરફારની સાથે જ શિક્ષણ વિભાગે પ્રવેશોત્સવમાં નિયુક્ત કરાયેલા તમામ ઉચ્ચ અધિકારીઓ અને પદાધિકારીઓ માટે એક અત્યંત મહત્વની અને કડક માર્ગદર્શિકા જાહેર કરી છે. સરકારી ખર્ચ પર નિયંત્રણ લાવવા અને પર્યાવરણની સુરક્ષાના હેતુથી પરિવહનના નિયમો બદલાયા છે:
-
કાર પુલિંગ (Car Pooling): અધિકારીઓને જિલ્લાઓમાં જવા માટે વ્યક્તિગત સરકારી વાહનો આપવાના બદલે ‘કાર પુલિંગ’ કરવાનો આદેશ અપાયો છે, એટલે કે એક જ ગાડીમાં એકથી વધુ અધિકારીઓએ સાથે પ્રવાસ કરવાનો રહેશે.
-
જાહેર પરિવહનને અગ્રતા: જે રૂટ પર રેલવેની કનેક્ટિવિટી ઉપલબ્ધ હોય, ત્યાં અધિકારીઓએ અચૂકપણે જાહેર પરિવહન (Public Transport) નો જ ઉપયોગ કરવો પડશે.
