બોડેલીમાં ઉનાળાની આકરી ગરમીનો કહેર, તાપમાન 42 ડિગ્રીની આસપાસ પહોંચતા જનજીવન પ્રભાવિત

બોડેલીમાં અત્યારે ઉનાળાની આકરી ગરમીનો પ્રકોપ જોવા મળી રહ્યો છે. તાજેતરના અહેવાલો મુજબ આસપાસના વિસ્તારોમાં તાપમાનનો પારો 40°C થી 42°C સુધી પહોંચતા જનજીવન પર તેની સીધી અસર જોવા મળી રહી છે. બપોરના સમયે રસ્તાઓ સૂમસામ બનતા નજરે પડે છે અને લોકો ગરમીથી બચવા ઘરમાં જ રહેવાનું પસંદ કરી રહ્યા છે.

આ પણ વાંચો…

બોડેલીના મનીષ માર્કેટમાં ખુલ્લી ગટર બન્યું અકસ્માતનું આમંત્રણ, ટ્રકના ક્લીનરે બનાવી સુરક્ષાત્મક આડ

તીવ્ર ગરમીના કારણે નાના બાળકો, વૃદ્ધો તેમજ દૈનિક મજૂરી કરતા લોકો સૌથી વધુ પરેશાન બની રહ્યા છે. ગરમ પવનો અને ઉકળાટભર્યા વાતાવરણને કારણે લોકોમાં થાક, ચક્કર અને ડિહાઇડ્રેશન જેવી સમસ્યાઓ વધી રહી છે. આરોગ્ય વિભાગ દ્વારા લોકોને જરૂરી હોય ત્યારે જ બપોર દરમિયાન બહાર નીકળવાની સલાહ આપવામાં આવી રહી છે.

ગરમીથી રાહત મેળવવા લોકો ઠંડા પીણાં, છાશ, લીંબુ પાણી અને ફળોના રસનો સહારો લઈ રહ્યા છે. સાથે જ માથા પર કપડું બાંધવું, પૂરતું પાણી પીવું અને તડકામાં લાંબા સમય સુધી ન રહેવાની અપીલ પણ કરવામાં આવી રહી છે.

હવામાન નિષ્ણાતોના જણાવ્યા મુજબ આગામી દિવસોમાં પણ ગરમીનો માહોલ યથાવત રહેવાની શક્યતા વ્યક્ત કરવામાં આવી છે.

રીપોર્ટર: અંજુમ ખત્રી, છોટાઉદેપુર