હમીરપુરમાં ભીષણ અકસ્માત: નેશનલ હાઈવે પર ટ્રક અને વેન વચ્ચે જોરદાર ટક્કર, 4 જાનૈયાઓના કરૂણ મોત

ઉત્તર પ્રદેશના હમીરપુર જિલ્લામાં સોમવારની મોડી રાત્રે એક કાળજું કંપાવનારો અકસ્માત સર્જાયો હતો.મોદહા નેશનલ હાઈવે-34 પર છિરકા ગામ પાસે એક પૂરપાટ ઝડપે આવતા ટ્રક અને ઓમ્ની વેન વચ્ચે સામસામે ભીષણ ટક્કર થઈ હતી.આ દુર્ઘટનામાં વેનમાં સવાર ચાર જાનૈયાઓના ઘટનાસ્થળે જ કમકમાટીભર્યા મોત નિપજ્યા હતા, જ્યારે ત્રણ અન્ય લોકો ગંભીર રીતે ઘાયલ થયા છે.

જાન લઈને જતી વેનનો કુરચો બોલી ગયો

પ્રાપ્ત વિગતો અનુસાર, કુરારા પોલીસ સ્ટેશન વિસ્તારના ડામર ગામથી કુશવાહા સમાજની એક જાન મહોબાના ખડ્ડી પહરા ગામે જઈ રહી હતી. જાનમાં સામેલ કેટલાક લોકો ઓમ્ની વેન દ્વારા મુસાફરી કરી રહ્યા હતા. વેન જેવી છિરકા ગામ પાસે પહોંચી, ત્યારે સામેથી આવતા એક તેજ રફ્તાર ટ્રકે તેને જોરદાર ટક્કર મારી હતી. ટક્કર એટલી પ્રચંડ હતી કે વેનનો કુરચો બોલી ગયો હતો અને તેના ફુરચા ઉડી ગયા હતા.

મૃતકો અને ઘાયલોની વિગત

આ અકસ્માતમાં જીવ ગુમાવનારાઓમાં મોહન (રહે. ઉર્દના), આશિષ (રહે. તિંદુહી), કમલેશ (રહે. ડામર) અને એક અજ્ઞાત વ્યક્તિનો સમાવેશ થાય છે. જ્યારે રોહિત (રહે. તિંદુહી), દિલીપ (રહે. ઉર્દના) અને બાબુજી (રહે. ડામર) ગંભીર રીતે ઘાયલ થયા છે. તમામને તાત્કાલિક સારવાર અર્થે જિલ્લા હોસ્પિટલમાં રિફર કરવામાં આવ્યા છે.

પોલીસ અને વહીવટીતંત્રની કાર્યવાહી

ઘટનાની જાણ થતા જ પોલીસ અધિક્ષક (SP) મૃગાંક શેખર પાઠક, સીઓ રાજકુમાર પાંડે અને પોલીસ કાફલો ઘટનાસ્થળે પહોંચી ગયો હતો. સ્થાનિક લોકોની મદદથી ઘાયલોને વેનમાંથી બહાર કાઢી હોસ્પિટલ પહોંચાડવામાં આવ્યા હતા. પોલીસે ચારેય મૃતદેહોનો કબજો મેળવી પોસ્ટમોર્ટમ માટે મોકલી આપ્યા છે.

મોદહાના સીઓ રાજકુમાર પાંડેએ જણાવ્યું હતું કે, ઈકો વેન અને ડમ્પર વચ્ચે આ ટક્કર થઈ હતી. હાલમાં ઘાયલોની સારવાર ચાલી રહી છે અને ટ્રક ચાલક વિરુદ્ધ કાયદેસરની કાર્યવાહી કરવામાં આવી રહી છે. એડિશનલ એસપી અરવિંદ કુમાર વર્માએ પણ હોસ્પિટલ પહોંચીને પીડિત પરિવારજનોને સાંત્વના આપી હતી અને ઘાયલોને શ્રેષ્ઠ સારવાર મળે તે માટે સૂચના આપી હતી.

તપાસ તેજ કરાઈ

ઘટનાસ્થળે પોલીસ ઉપરાંત તહસીલદાર શિખર મિશ્રા અને નાયબ તહસીલદાર મહેન્દ્ર ગુપ્તા પણ હાજર રહ્યા હતા. મહેસૂલ વિભાગ અને પોલીસની ટીમે સંયુક્ત રીતે રાહત કાર્યમાં સહયોગ આપ્યો હતો. અકસ્માત પાછળ ટ્રકની ઓવરસ્પીડિંગ જવાબદાર છે કે કેમ તે દિશામાં પોલીસ ઝીણવટભરી તપાસ કરી રહી છે.