એપ્રિલ મહિનામાં ભારતીય મહિલા ટીમ પાંચ મેચોની T20 સિરીઝ માટે સાઉથ આફ્રિકાનો પ્રવાસ કરશે. આ સિરીઝ માટે BCCIએ ટીમ ઈન્ડિયાના સ્ક્વોડની જાહેરાત કરી દીધી છે. આ સિરીઝમાં હરમનપ્રીત કૌર જ ટીમ ઈન્ડિયાનું નેતૃત્વ કરતી જોવા મળશે. આ T20 સિરીઝ દ્વારા ભારતીય મહિલા ટીમ જૂન મહિનામાં યોજાનારા વુમન્સ T20 વર્લ્ડ કપ માટે પોતાની તૈયારીઓને આખરી ઓપ આપવા માંગશે. હરમનની કેપ્ટન્સીમાં જ ટીમ ઈન્ડિયાએ ગયા વર્ષે વનડે વર્લ્ડ કપનો ખિતાબ જીત્યો હતો.
ટીમમાં ફેરફાર અને નવા ચહેરા
ભારતીય મહિલા T20 ટીમમાં પ્રથમ વખત અનુષ્કા શર્માનો સમાવેશ કરવામાં આવ્યો છે. તેમની સાથે ઉમા છેત્રી અને કાશ્વી ગૌતમને પણ T20 સિરીઝ માટે પસંદ કરવામાં આવ્યા છે.
બીજી તરફ, વૈષ્ણવી શર્મા, સ્નેહ રાણા, જી. કમલિની અને અમનજોત કૌરને ટીમમાંથી બહાર કરવામાં આવ્યા છે. કમલિનીની જગ્યાએ ઉમાને ટીમમાં સામેલ કરવામાં આવી છે. મહિલા ટીમે તાજેતરમાં જ ઓસ્ટ્રેલિયાનો પ્રવાસ કર્યો હતો, જ્યાં તેમને વનડે સિરીઝમાં હારનો સામનો કરવો પડ્યો હતો, પરંતુ T20 સિરીઝમાં ભારત 2-1થી વિજેતા બન્યું હતું. હવે સાઉથ આફ્રિકાના પ્રવાસ પર ટીમ ઈન્ડિયા આ જ પ્રદર્શનનું પુનરાવર્તન કરવા ઈચ્છશે.
બોલિંગ વિભાગમાં મજબૂતી
સાઉથ આફ્રિકા સામેની સિરીઝ માટે ટીમ ઈન્ડિયાએ પોતાના ફાસ્ટ બોલિંગ વિભાગને મજબૂત બનાવ્યો છે. આ માટે અમનજોત કૌરની જગ્યાએ કાશ્વી ગૌતમને ટીમમાં લીધી છે. કાશ્વીએ ઓસ્ટ્રેલિયામાં વનડે સિરીઝ દરમિયાન સારું પ્રદર્શન કર્યું હતું. સ્પિન બોલિંગની જવાબદારી દીપ્તિ શર્મા, શ્રી ચરાની અને શ્રેયંકા પાટીલ સંભાળશે.
