IT, ઓટો, બેંકિંગ શેરોમાં તેજી : સેન્સેક્સ ૧૧૦૯ પોઈન્ટની છલાંગે ૭૩૦૩૪
ભારતીય શેરબજારમાં આજે તેજીનો મોટો માહોલ જોવા મળ્યો હતો. એલટીસીજી (LTCG) અને એસટીટી (STT) ટેક્સ મુદ્દે સરકાર દ્વારા વાટાઘાટો અને વિચારણાના સંકેતો મળતા બજારને મોટો બૂસ્ટર ડોઝ મળ્યો છે. આ સાથે એચસીએલ ટેક્નોલોજીસના શાનદાર ત્રિમાસિક પરિણામો, ક્રૂડ ઓઈલના ભાવમાં બે ટકાનો ઘટાડો અને વૈશ્વિક પરિબળોને કારણે રોકાણકારોમાં ઉત્સાહ જોવા મળ્યો હતો. બોમ્બે સ્ટોક એક્સચેન્જ (BSE) નો સેન્સેક્સ ૧,૧૦૯.૧૦ પોઈન્ટની શાનદાર છલાંગ લગાવીને ૭૩,૦૩૩.૭૮ અને નેશનલ સ્ટોક એક્સચેન્જ (NSE) નો નિફટી ૩૫૮.૬૦ પોઈન્ટ ઉછળીને ૨૨,૭૨૧.૯૫ ની સપાટીએ બંધ રહ્યા હતા. આ એક દિવસીય તેજીથી રોકાણકારોની સંપત્તિમાં રૂ. ૪.૫૮ લાખ કરોડનો મોટો વધારો થયો છે અને કુલ માર્કેટ કેપિટલાઈઝેશન વધીને રૂ. ૪૭૦.૦૩ લાખ કરોડ પહોંચ્યું છે.
બજારના મુખ્ય ક્ષેત્રો અને વિશેષતાઓની વિગતો:
-
આઈટી (IT) શેરોમાં આક્રમક તેજી: એચસીએલ ટેક્નોલોજીસનો ચોખ્ખો નફો ૨૧.૨ ટકા વધીને રૂ. ૫,૧૩૨ કરોડ થતા આઈટી શેરોમાં જોરદાર લેવાલી નીકળી હતી. ટેક મહિન્દ્રા, ઇન્ફોસીસ, વિપ્રો અને ટાટા એલેક્સી સહિતના શેરો ઉછળ્યા હતા, જેના કારણે બીએસઈ આઈટી ઇન્ડેક્સ ૧,૩૪૦.૫૫ પોઈન્ટ વધીને ૨૮,૫૬૦.૪૯ પર બંધ રહ્યો હતો.
-
ઓટોમોબાઈલ શેરોમાં ખરીદી: તહેવારોની મોસમ શરૂ થતાં વાહનોની માંગ વધવાની આશાએ ફંડોએ ઓટો શેરોમાં આક્રમક ખરીદી કરી હતી. ટાટા મોટર્સ, મહિન્દ્રા એન્ડ મહિન્દ્રા, બજાજ ઓટો અને હીરો મોટોકોર્પના શેરોમાં તેજી જોવા મળી હતી.
-
બેન્કિંગ અને ફાઈનાન્સ શેરો ઊંચકાયા: બેન્કેક્સ ઇન્ડેક્સ ૫૭૭.૯૩ પોઈન્ટ વધીને ૬૨,૪૩૯.૧૫ પર બંધ રહ્યો હતો. એસબીઆઈ, એચડીએફસી બેંક, આઈસીઆઈસીઆઈ બેંક અને એક્સિસ બેંક જેવા દિગ્ગજ શેરોમાં ખરીદી રહી હતી.
-
કન્ઝ્યુમર ડ્યુરેબલ્સ અને અન્ય ક્ષેત્રો: તહેવારોમાં હોમ એપ્લાયન્સિસની માંગ વધવાની અપેક્ષાએ બ્લુ સ્ટાર અને વોલ્ટાસ જેવા કન્ઝ્યુમર શેરો ઉછળ્યા હતા. આ ઉપરાંત મેટલ-માઈનિંગ અને ઓઈલ-ગેસ શેરોમાં પણ હરિયાળી જોવા મળી હતી.
-
विदेशी અને સ્થાનિક સંસ્થાઓનું વલણ: વિદેશી સંસ્જાગ રોકાણકારો (FPIs/FIIs) દ્વારા આજે કેશ સેગ્મેન્ટમાં રૂ. ૧,૩૦૫.૧૩ કરોડની ચોખ્ખી વેચવાલી કરવામાં આવી હતી, જ્યારે સ્થાનિક સંસ્થાકીય રોકાણકારો (DIIs) દ્વારા રૂ. ૨,૪૩૯.૨૪ કરોડના શેરોની જંગી ખરીદી કરવામાં આવી હતી.
