મહીસાગર જિલ્લાના લુણાવાડા-સંતરામપુર હાઈવે પર રાફાઈ ગામ નજીક આજે વહેલી સવારે એક અત્યંત ગમખ્વાર માર્ગ અકસ્માત સર્જાયો છે. કાર અને દૂધના ટેન્કર વચ્ચે થયેલી પ્રચંડ ટક્કરમાં કારમાં સવાર ત્રણ લોકોનાં ઘટનાસ્થળે જ કરૂણ મોત નિપજ્યા છે, જેના કારણે સમગ્ર પંથકમાં અરેરાટી સાથે શોકની કાળી ડિબંગ છાયા ફરી વળી છે.
ટક્કર એટલી પ્રચંડ હતી કે કારનો કચ્ચરઘાણ નીકળી ગયો
-
અકસ્માતની તીવ્રતા: લુણાવાડાથી સંતરામપુર તરફ જઈ રહેલી કાર અને સામેથી આવતા દૂધના ટેન્કર વચ્ચે રાફાઈ ગામ પાસે જોરદાર અકસ્માત થયો હતો. ટક્કર એટલી ભયાનક હતી કે કારનો સંપૂર્ણ કચ્ચરઘાણ નીકળી ગયો હતો.
-
સ્થાનિકોની દોડધામ: અકસ્માતનો ધડાકો સાંભળીને આસપાસના ગ્રામજનો અને રાહદારીઓ તાત્કાલિક મદદ માટે ઘટનાસ્થળે દોડી આવ્યા હતા, પરંતુ કારમાં સવાર ત્રણેય લોકોએ સ્થળ પર જ દમ તોડી દીધો હતો.
પોલીસે મૃતદેહો પીએમ માટે ખસેડ્યા, તપાસ શરૂ
-
પોલીસ કાર્યવાહી: ઘટનાની જાણ થતાં જ લુણાવાડા પોલીસનો કાફલો સ્થળ પર પહોંચી ગયો હતો. પોલીસે મૃતદેહોને કબજે કરી પંચનામું કર્યા બાદ પોસ્ટમોર્ટમ અર્થે નજીકની હોસ્પિટલમાં ખસેડ્યા છે.
-
ટ્રાફિક પૂર્વવત: અકસ્માતના કારણે હાઈવે પર સર્જાયેલા ટ્રાફિક જામને પોલીસે ભારે જહેમત બાદ ખુલ્લો કરાવ્યો હતો.
-
તપાસ ચાલુ: પોલીસે બનાવ અંગે ગુનો નોંધી મૃતકોની ઓળખ છતી કરવા તેમજ અકસ્માતનું ચોક્કસ કારણ જાણવા આગળની કાયદેસરની તપાસ હાથ ધરી છે.
