સુરત: શહેરના ઉત્રાણ વિસ્તારમાં રહેણાંક મકાનમાં ચાલતા જુગારધામ પર ઉત્રાણ પોલીસે સફળ દરોડો પાડી 7 મહિલાઓની ધરપકડ કરી છે. કાર્યવાહી દરમિયાન રોકડ રકમ અને મોબાઇલ ફોન સહિત કુલ રૂ. 1.22 લાખનો મુદ્દામાલ જપ્ત કરવામાં આવ્યો છે.
પોલીસને મળેલી ચોક્કસ બાતમીના આધારે ઉમરાગામ સ્થિત રાધે રેસિડન્સીના એક રહેણાંક મકાનમાં દરોડો પાડવામાં આવ્યો હતો. તપાસ દરમિયાન મકાનમાં મહિલાઓ ગેરકાયદેસર રીતે જુગાર રમતી હોવાનું સામે આવ્યું હતું.
પોલીસે સ્થળ પરથી રોકડ રકમ, જુગારમાં ઉપયોગમાં લેવાતો સામાન તેમજ 6 મોબાઇલ ફોન કબજે કરીને કુલ રૂ. 1.22 લાખનો મુદ્દામાલ જપ્ત કર્યો હતો.
ઉત્રાણ પોલીસે તમામ 7 મહિલાઓ સામે જુગારધારા હેઠળ ગુનો નોંધી વધુ તપાસ શરૂ કરી છે. આ જુગાર પ્રવૃત્તિ પાછળ અન્ય કોઈ વ્યક્તિ અથવા સંગઠિત નેટવર્ક સંકળાયેલું છે કે નહીં તે મુદ્દે પણ તપાસ ચાલી રહી છે.
