વિશાળ ખડક ધસી પડતાં કામદારો કાટમાળ નીચે દટાયા; બચાવ કામગીરી બાદ મૃતદેહો બહાર કાઢાયા, તપાસના આદેશ
બેંગલુરુ: કર્ણાટકની રાજધાની બેંગલુરુમાં બુધવારે સવારે પથ્થરની ખાણમાં થયેલા ભૂસ્ખલનના ગંભીર અકસ્માતમાં બિહારના સાત શ્રમિકોના મોત થયા છે. તવરેકેરે પોલીસ સ્ટેશન વિસ્તારની ખાણમાં અચાનક વિશાળ ખડક ધસી પડતાં કામદારો કાટમાળ નીચે દટાઈ ગયા હતા.
ઘટનાની જાણ થતાં જ પોલીસ, ફાયર બ્રિગેડ અને બચાવ દળો તાત્કાલિક સ્થળ પર દોડી આવ્યા હતા. કલાકો સુધી ચાલેલા રેસ્ક્યુ ઓપરેશન બાદ કાટમાળમાંથી તમામ મૃતદેહો બહાર કાઢવામાં આવ્યા હતા. ઘટનાને પગલે સમગ્ર વિસ્તારમાં શોકનો માહોલ છવાઈ ગયો છે.
પ્રાથમિક તપાસમાં સામે આવ્યું છે કે અકસ્માત સમયે શ્રમિકો નિયમિત કામગીરી કરી રહ્યા હતા. અચાનક ખાણનો એક મોટો ભાગ ધસી પડતાં વિશાળ પથ્થરો તેમની ઉપર પડ્યા હતા, જેના કારણે તેઓ કાટમાળ નીચે દટાઈ ગયા હતા.
અધિકારીઓના જણાવ્યા મુજબ, મૃતક તમામ શ્રમિકો મૂળ બિહારના રહેવાસી છે. તેમની ઓળખની સત્તાવાર કાર્યવાહી ચાલી રહી છે. મૃતદેહોને પોસ્ટમોર્ટમ માટે હોસ્પિટલ મોકલવામાં આવ્યા છે અને તેમના પરિવારજનોને ઘટનાની જાણ કરવામાં આવી રહી છે.
અકસ્માત બાદ ખાણમાં કામ કરતા અન્ય તમામ શ્રમિકોને સલામત સ્થળે ખસેડવામાં આવ્યા હતા. વધુ કોઈ અકસ્માત ન સર્જાય તે માટે સમગ્ર વિસ્તારને સીલ કરીને સુરક્ષા વ્યવસ્થા ગોઠવવામાં આવી છે.
જિલ્લા પ્રશાસને સમગ્ર ઘટનાની તપાસના આદેશ આપ્યા છે. ભૂસ્ખલન કુદરતી કારણોસર થયું હતું કે સલામતીના નિયમોની અવગણના તેના માટે જવાબદાર હતી, તે અંગે વિવિધ પાસાઓથી તપાસ શરૂ કરવામાં આવી છે.
