નવી દિલ્હી: ક્રિકેટ જગતના દિગ્ગજ Virat Kohliની લોકપ્રિયતાનો વધુ એક પુરાવો સામે આવ્યો છે. તેમની બ્રાન્ડ One8 દ્વારા લોન્ચ કરાયેલા સ્પેશિયલ એડિશન શૂઝે બજારમાં જબરદસ્ત પ્રતિસાદ મેળવતાં વેચાણના તમામ અંદાજો વટાવી દીધા છે.
કંપની દ્વારા લોન્ચ કરાયેલા આ શૂઝની કિંમત ₹9,230 રાખવામાં આવી હતી, જે વિરાટ કોહલીના ટેસ્ટ ક્રિકેટમાં નોંધાયેલા રનના આંકડાને સમર્પિત હોવાનું જણાવવામાં આવ્યું છે. અનોખી થીમ અને કોહલીના ચાહકોમાં ભારે ઉત્સાહને કારણે લોન્ચિંગ બાદ જ ખરીદી માટે પડાપડી મચી ગઈ હતી.
માત્ર 24 કલાકની અંદર અંદાજે 1.5 લાખ જોડી શૂઝ વેચાઈ જતા સમગ્ર સ્ટોક ‘આઉટ ઓફ સ્ટોક’ થઈ ગયો હતો. વેચાણના આંકડાઓના આધારે કંપનીને અંદાજિત ₹140 કરોડની બંપર આવક થઈ હોવાનું માનવામાં આવે છે.
માર્કેટિંગ નિષ્ણાતોના મતે, વિરાટ કોહલીની મજબૂત બ્રાન્ડ ઈમેજ, યુવાનોમાં તેમની લોકપ્રિયતા અને મર્યાદિત સંખ્યામાં ઉપલબ્ધ પ્રોડક્ટની વ્યૂહરચનાએ આ અભૂતપૂર્વ સફળતા અપાવી છે. સોશિયલ મીડિયા પર પણ આ શૂઝ અંગે ભારે ચર્ચા જોવા મળી રહી છે.
ક્રિકેટ મેદાન પર અનેક રેકોર્ડ પોતાના નામે કરનાર વિરાટ કોહલીએ હવે બ્રાન્ડિંગ અને વ્યાપાર ક્ષેત્રે પણ એક નવો વેચાણ રેકોર્ડ સર્જ્યો હોવાનું માનવામાં આવી રહ્યું છે. One8ની આ સફળતા ભારતીય સ્પોર્ટ્સ અને લાઇફસ્ટાઇલ માર્કેટ માટે એક મહત્વપૂર્ણ ઘટના તરીકે જોવામાં આવી રહી છે.
