રાજ્યના યુવાનો અને રમતગમત ક્ષેત્રે કારકિર્દી બનાવવા માંગતા ઉમેદવારો માટે આનંદના સમાચાર આવ્યા છે. ગુજરાત સરકારના શિક્ષણ વિભાગ દ્વારા રાજ્યની સરકારી શાળાઓમાં લાંબા સમયથી ખાલી પડેલી વ્યાયામ શિક્ષકોની (Physical Education Teachers) જગ્યાઓ ભરવાનો મહત્વનો નિર્ણય લેવામાં આવ્યો છે. મુખ્યમંત્રી ભૂપેન્દ્રભાઈ પટેલે આ ભરતી પ્રક્રિયા માટે મંજૂરી આપી દીધી છે.
ભરતી પ્રક્રિયાનું ટાઈમલાઈન
સરકાર આ ભરતી પ્રક્રિયાને ઝડપથી પૂર્ણ કરવાના મૂડમાં છે:
-
શરૂઆત: ભરતી પ્રક્રિયાની શરૂઆત આગામી ઓગસ્ટ મહિનામાં કરવામાં આવશે.
-
પૂર્ણતા: સરકારનો લક્ષ્યાંક છે કે દિવાળી સુધીમાં તમામ પ્રક્રિયા પૂર્ણ કરી લાયક ઉમેદવારોને નિમણૂક પત્રો એનાયત કરી દેવામાં આવે.
ભરતીના નવા નિયમો (RR) અને પારદર્શિતા
આગામી બે મહિનામાં શિક્ષણ વિભાગ વ્યાયામ શિક્ષકો માટેના નવા ભરતી નિયમો (Recruitment Rules – RR) જાહેર કરશે. આ નિયમોને આધારે ઉમેદવારોની શૈક્ષણિક લાયકાત, વયમર્યાદા અને પસંદગીના ધોરણો નક્કી કરવામાં આવશે, જેથી સમગ્ર પ્રક્રિયા પારદર્શક રહે.
શાળાઓમાં નિમણૂકના નવા ધોરણો
સરકારે શાળાઓમાં વિદ્યાર્થીઓની સંખ્યાના આધારે શિક્ષકોની નિમણૂક માટે ચોક્કસ માપદંડો નક્કી કર્યા છે:
-
500 થી વધુ વિદ્યાર્થીઓ: જે શાળાઓમાં સંખ્યા 500 થી વધારે છે. ત્યાં કાયમી વ્યાયામ શિક્ષકની નિમણૂક કરવામાં આવશે.
-
500 થી ઓછા વિદ્યાર્થીઓ: ઓછી સંખ્યા ધરાવતી શાળાઓમાં હાલની ‘ખેલ સહાયક’ યોજના અંતર્ગતની નિમણૂકો યથાવત રહેશે.
