ગાંધીનગર: રૂપાલમાં આસ્થાનો મહાસાગર! વરદાયિની માતાજીના મંદિરે પરંપરાગત પલ્લી મહોત્સવ આજે, ૨૦ કરોડથી વધુના ઘીના અભિષેક સાથે ૧૦ લાખ ભક્તો ઉમટશે

ગાંધીનગર: રૂપાલના વરદાયિની મંદિરે આજે પરંપરાગત પલ્લીનો મેળો, માર્ગો ઉપર ઘીની નદીઓ વહેશે, તંત્ર ઍલર્ટ મોડ પર

ગાંધીનગર નજીક આવેલા ઐતિહાસિક અને આસ્થાના પ્રતિકસમા રૂપાલ ગામે આજે (૧૯મી ઑક્ટોબર) આસો નવરાત્રિની નોમની રાત્રિએ માતા વરદાયિનીની ભવ્ય અને પરંપરાગત પલ્લીની સવારી નીકળશે. મહાભારત કાળથી ચાલી આવતી આ અનોખી પરંપરા અંતર્ગત મધ્યરાત્રિએ પાંચ જ્યોતવાળી પલ્લી ઉપર ૨૦ કરોડથી વધુ રૂપિયાના શુદ્ધ ઘીનો અભિષેક કરવામાં આવશે, જેના કારણે રૂપાલના માર્ગો પર ઘીની નદીઓ વહેતી જોવા મળશે. આ ભવ્ય ઉત્સવમાં અંદાજે ૧૦ લાખ જેટલા ભક્તો ઉમટવાના હોઈ વહીવટી તંત્ર અને મંદિર ટ્રસ્ટ દ્વારા સુરક્ષા અને સુવિધાની વ્યાપક વ્યવસ્થાઓ ગોઠવી દેવામાં આવી છે.

રૂપાલ પલ્લી મહોત્સવ અને તંત્રની તૈયારીઓ અંગેની મુખ્ય વિગતો:

• પૌરાણિક મહાત્મ્ય: માનવામાં આવે છે કે હસ્તિનાપુરના યુદ્ધમાં વિજય બાદ ભગવાન શ્રી કૃષ્ણની પ્રેરણાથી પાંડવોએ રૂપાલમાં સોનાની પલ્લી બનાવીને માતાજીની આરાધના કરી હતી, ત્યારથી આ પરંપરા અવિરત ચાલી આવે છે.

• ભારે વાહનો માટે પ્રતિબંધ: લાખો ભક્તોની ભીડને ધ્યાનમાં રાખીને રૂપાલ ગામને જોડતા મુખ્ય માર્ગો ભારે વાહનો માટે બંધ કરી દેવામાં આવ્યા છે અને રૂટ ડાયવર્ટ કરવામાં આવ્યા છે.

• ચુસ્ત પોલીસ બંદોબસ્ત: કાયદો અને વ્યવસ્થા જાળવવા માટે ૧૧ એક્ઝિક્યુટિવ મેજિસ્ટ્રેટ, ૨૪ મહત્ત્વના સ્થળો પર દેખરેખ માટે અધિકારીઓ તેમજ ૫૦૦ પોલીસ જવાનો અને ૩૦૦ હોમગાર્ડ જવાનો ખડેપગે ફરજ બજાવશે.

• આરોગ્ય અને આપત્તિ વ્યવસ્થાપન: મેળામાં આવતા ભાવિકો માટે ૪ મેડિકલ ટીમો (મંદિર, પીએચસી અને આંગણવાડી ખાતે) રાઉન્ડ ધી ક્લોક તૈનાત રહેશે, સાથે જ ૩ ૧૦૮ એમ્બ્યુલન્સ અને ૪ ફાયર સેફ્ટી ટીમો સ્ટેન્ડ ટુ રાખવામાં આવી છે. પીવાના પાણીની ગુણવત્તા તપાસવા માટે સુપર ક્લોરીનેશનની વ્યવસ્થા કરાઈ છે.

• એસ.ટી. બસોની એક્સ્ટ્રા ટ્રીપ: ભક્તોની અવરજવર સરળ બને તે માટે ગાંધીનગર, કલોલ અને માણસા એસ.ટી. ડેપો દ્વારા બપોર બાદથી સવાર સુધી રૂપાલ રૂટ પર સ્પેશિયલ અને એક્સ્ટ્રા બસોનું સંચાલન કરવામાં આવશે.