ભાવનગર શહેર અને આસપાસના ગ્રામ્ય વિસ્તારોમાં ડુપ્લીકેટ દારૂના કારોબારે ભારે તબાહી મચાવી છે. ગેરકાયદેસર રીતે વેચાયેલા નકલી દારૂના સેવનથી અત્યાર સુધીમાં મૃત્યુઆંક વધીને 5 પર પહોંચી ગયો છે. આ ગંભીર ઘટનાની તપાસ કરી રહેલી સ્ટેટ મોનિટરિંગ સેલ (SMC) ની ટીમે સમગ્ર કાંડના મુખ્ય આરોપી રઇસને મધ્યપ્રદેશના ઇન્દોરથી ઝડપી લીધો છે અને તેને વધુ પૂછપરછ અર્થે ભાવનગર લાવવામાં આવી રહ્યો છે.
સરકારી શિક્ષક સહિત 2 ના શંકાસ્પદ મોતથી ચકચાર
-
શિક્ષકનો મૃતદેહ મળ્યો: શહેરના ગિલ્બર્ટ એપાર્ટમેન્ટ સ્થિત બંધ મકાનમાંથી સોનગઢ વિસ્તારના એક સરકારી શિક્ષકનો મૃતદેહ અત્યંત કોહવાયેલી હાલતમાં મળી આવ્યો હતો. સ્થળ પરથી દારૂની બોટલો મળી આવતાં આ મોત પણ ડુપ્લીકેટ દારૂથી થયું હોવાની આશંકા સેવાઈ રહી છે.
-
વધુ મોતથી દોડધામ: મોડી રાત્રે વધુ 2 લોકોના શંકાસ્પદ સંજોગોમાં મોત નીપજતાં કુલ મૃત્યુઆંક 5 પર પહોંચ્યો છે. પોલીસે મૃતદેહોને પોસ્ટમોર્ટમ અર્થે મોકલી તપાસ હાથ ધરી છે.
21 બુટલેગરો સામે ગુનો, તપાસનો ધમધમાટ
-
આંતરરાજ્ય નેટવર્ક: દારૂકાંડના તાર મધ્યપ્રદેશ સાથે જોડાયેલા હોવાનું બહાર આવ્યા બાદ પોલીસે અત્યાર સુધીમાં કુલ 21 જેટલા બુટલેગરો અને સંડોવાયેલા શખ્સો સામે ગુનો નોંધ્યો છે.
-
ટેકનિકલ તપાસ: ઘટનાસ્થળેથી એફએસએલ (FSL) ની મદદથી નમૂના એકત્ર કરાયા છે. પોલીસ સીસીટીવી (CCTV) ફૂટેજ અને આરોપીઓના કોલ ડિટેઈલ રેકોર્ડ (CDR) ના આધારે નેટવર્કના મૂળ સુધી પહોંચવા તપાસ તેજ કરી રહી છે.
મુખ્ય આરોપી રઇસની ધરપકડ બાદ આ કૌભાંડમાં સામેલ અન્ય મોટા વેપારીઓ અને નેટવર્ક અંગે ચોંકાવનારા ખુલાસા થવાની શક્યતા છે.
