અમદાવાદ શહેરમાં રોડ પર પડેલા ખાડા, ભુવા, ક્ષતિગ્રસ્ત ફૂટપાથ અને વરસાદી પાણી ભરાવાની સમસ્યાઓથી નાગરિકોને ઝડપી રાહત આપવા માટે અમદાવાદ મ્યુનિસિપલ કોર્પોરેશન (AMC) હવે હાઈટેક આર્ટિફિશિયલ ઇન્ટેલિજન્સ (AI) ટેકનોલોજીનો ઉપયોગ કરશે. નવી ‘સિટિઝન સિવિક સબમિશન’ (CCRS) સિસ્ટમ અંતર્ગત આ મહિનાના અંત સુધીમાં આ સુવિધા અમલી બનાવવાની તૈયારીઓ પૂર્ણ કરી દેવામાં આવી છે.
ફોટો અપલોડ કરતાં જ AI આપમેળે સ્થળ અને કેટેગરી નક્કી કરશે
-
સરળ ફરિયાદ પ્રક્રિયા: રોડ એન્ડ બિલ્ડિંગ કમિટીના ચેરમેન જૈનિક વકીલના જણાવ્યા મુજબ, નાગરિકોએ AMC Seva App અથવા AMC CCRS App મારફતે માત્ર સમસ્યાનો ફોટો અપલોડ કરવાનો રહેશે.
-
ઓટોમેટિક લોકેશન અને વોટ્સએપ: AI સિસ્ટમ ફોટોના આધારે ફરિયાદની કેટેગરી આપમેળે નક્કી કરશે. GPS અને GIS મેપિંગ ટેકનોલોજી દ્વારા ચોક્કસ વોર્ડ, ઝોન અને સંબંધિત અધિકારીને ઓટો-એલોકેશન થઈ જશે.
ડુપ્લિકેટ ફરિયાદોનું કટિંગ અને ‘Before-After’ નો પુરાવો
-
AI ક્લસ્ટરિંગ ટેકનોલોજી: એક જ ખાડા કે સમસ્યા માટે અલગ-અલગ લોકો દ્વારા કરાતી ફરિયાદોને AI ભેગી કરીને એક ‘ક્લસ્ટર’ બનાવશે, જેથી ડુપ્લિકેટ ફરિયાદો અટકશે અને કામગીરી ઝડપી બનશે.
-
WhatsApp પર અપડેટ: ફરિયાદ નોંધાતા જ નાગરિકને WhatsApp પર ટોકન નંબર મળશે. કામ પૂર્ણ થયા બાદ અધિકારીઓએ કામગીરી પહેલાંનો (Before) અને પછીનો (After) ફોટોગ્રાફ મોકલવો પડશે, જે સીધો નાગરિકને વોટ્સએપ પર પુરાવા રૂપે મળી જશે.
મલ્ટિપલ પ્લેટફોર્મ્સ અને પારદર્શિતા
-
વિવિધ માધ્યમોથી ફરિયાદ: એપ સિવાય નાગરિકો WhatsApp, ટેલિફોન, ઈમેઈલ અને સોશિયલ મીડિયા દ્વારા પણ પોતાની રજૂઆત કરી શકશે.
-
મહત્તમ પારદર્શિતા: વરસાદી સીઝનમાં ખાસ કરીને ભરાતા પાણી અને ખાડાની કામગીરીમાં વિલંબ અટકાવવા માટે આ ડિજિટલ મોડેલથી વહીવટી પારદર્શિતા વધશે અને નાગરિકોને સીધો ફાયદો થશે.
