એસ.ટી. બસો યોગ્ય રીતે ઉભી ન રહી શકતી હોવાના દાવા; વધુ ભાડાની વસૂલાત અંગે સ્થાનિકોએ કાર્યવાહી માગી
જોડિયા/પડધરી: પડધરી ખાતે વેરાઈ હોટલ સામે સાંસદ સભ્યની ગ્રાન્ટમાંથી બનાવાયેલા એસ.ટી. પિકઅપ બસ સ્ટેન્ડને લઈને સ્થાનિકોમાં અસંતોષ જોવા મળી રહ્યો છે. સ્થાનિકોના આક્ષેપ મુજબ બસ સ્ટેન્ડ વિસ્તારમાં કેટલાક ઓટો રિક્ષા ચાલકોના કાયમી દબાણને કારણે એસ.ટી. બસોને મુસાફરો માટે યોગ્ય રીતે ઉભી રહેવામાં મુશ્કેલી પડે છે, જેના પરિણામે કેટલીક બસો મુસાફરો લીધા વિના જ આગળ વધી જતી હોવાનું જણાવાઈ રહ્યું છે.
સ્થાનિકોના જણાવ્યા અનુસાર, પડધરી-નેકનામ-મિતાણા-મોરબી-વાંકાનેર રૂટના મુસાફરો માટે બનાવાયેલા આ બસ સ્ટેન્ડનો હેતુ મુસાફરોને સરળ અને સુવિધાજનક પરિવહન ઉપલબ્ધ કરાવવાનો હતો. જોકે, દબાણની સ્થિતિને કારણે મુસાફરોને મુશ્કેલીનો સામનો કરવો પડી રહ્યો છે અને એસ.ટી. નિગમને પણ આવકમાં નુકસાન થતું હોવાનો દાવો કરવામાં આવી રહ્યો છે.
પડધરી, નેકનામ અને મિતાણા વિસ્તારમાં અનેક ઔદ્યોગિક એકમો હોવાથી દરરોજ મોટી સંખ્યામાં પરપ્રાંતીય કામદારો અવરજવર કરે છે. સ્થાનિકોના જણાવ્યા મુજબ, પડધરીથી નેકનામ વચ્ચેનું એસ.ટી. બસનું ભાડું અંદાજે રૂ.12થી રૂ.15 જેટલું છે, જ્યારે કેટલાક ઓટો રિક્ષા ચાલકો પ્રતિ મુસાફર રૂ.30 સુધીનું ભાડું વસૂલતા હોવાના આક્ષેપ કરવામાં આવ્યા છે. ઉપરાંત કેટલાક પરપ્રાંતીય કામદારો પાસેથી ખાસ ભાડાના નામે રૂ.300થી રૂ.500 સુધીની રકમ લેવામાં આવતી હોવાની પણ રજૂઆતો કરવામાં આવી છે.
સ્થાનિકોનો એવો પણ દાવો છે કે દર સોમવારે પડધરીમાં ભરાતા સાપ્તાહિક બજાર દરમિયાન મુસાફરો અને ઓટો રિક્ષા ચાલકો વચ્ચે ભાડાને લઈને તકરારના બનાવો બનતા રહે છે.
આ સમગ્ર મામલે સ્થાનિકોએ ધારાસભ્ય, સાંસદ, જિલ્લા વહીવટી તંત્ર અને રાજ્ય પરિવહન નિગમ સમક્ષ રજૂઆત કરીને પિકઅપ બસ સ્ટેન્ડ વિસ્તારને દબાણમુક્ત કરાવવાની, એસ.ટી. બસોને નિયમિત રીતે ઉભી રહે તેવી વ્યવસ્થા સુનિશ્ચિત કરવાની તથા વધુ ભાડું વસૂલાત અંગે મળતી ફરિયાદોની તપાસ કરીને જરૂરી કાર્યવાહી કરવાની માંગ કરી છે.
જોકે, આ આક્ષેપો અંગે એસ.ટી. વિભાગ અથવા સંબંધિત સત્તાધિકારીઓ તરફથી હજુ સુધી કોઈ સત્તાવાર પ્રતિક્રિયા સામે આવી નથી.
