વડોદરા: આધાર કાર્ડ સંબંધિત સેવાઓ માટે લાંબી રાહ જોતા નાગરિકો માટે રાહતના સમાચાર છે. વડોદરા મહાનગરપાલિકામાં 20 જુલાઈથી આધાર કાર્ડની કામગીરી વધુ ઝડપી, સરળ અને વ્યાપક બનવાની છે. રાજ્ય સરકાર દ્વારા આપવામાં આવેલી નવી આધુનિક આધાર કીટના કારણે શહેરના તમામ 19 વોર્ડમાં આ સેવા ઉપલબ્ધ થશે.
માહિતી અનુસાર, રાજ્ય સરકારે કોર્પોરેશનને 20 નવી આધાર કીટ ફાળવી છે. હાલ આ કીટને સિસ્ટમ સાથે જોડવાની અને ટેક્નિકલ ઇન્સ્ટોલેશનની પ્રક્રિયા ચાલી રહી છે. કામગીરી પૂર્ણ થયા બાદ આધાર કાર્ડ સંબંધિત વિવિધ સેવાઓનો વ્યાપ વધશે.
નવી કીટમાં અદ્યતન ટેક્નોલોજીનો સમાવેશ કરવામાં આવ્યો છે, જેના કારણે ઓળખ ચકાસણી અને ડેટા અપડેટની પ્રક્રિયા વધુ ચોક્કસ બનશે. કીટમાં ડેસ્કટોપ કમ્પ્યુટર, ડિસ્પ્લે યુનિટ, યુપીએસ, સિંગલ અને ડબલ આઇરિસ સ્કેનર તેમજ થમ્બ સ્કેનર સહિત લગભગ 15 પ્રકારના સાધનોનો સમાવેશ કરવામાં આવ્યો છે.
હાલમાં શહેરના માત્ર સાત વોર્ડમાં આધાર કાર્ડની કામગીરી ચાલી રહી છે, જેના કારણે નાગરિકોને દૂર સુધી જવું પડતું હતું. પરંતુ 20 જુલાઈ પછી તમામ 19 વોર્ડમાં સેવા શરૂ થતાં લોકોને પોતાના વિસ્તાર નજીક જ સુવિધા મળી શકશે.
સેવાઓને વધુ અસરકારક બનાવવા માટે હાલના 12 ઓપરેટરો ઉપરાંત વધુ 8 નવા ઓપરેટરોની ભરતી પ્રક્રિયા પણ હાથ ધરવામાં આવી છે. કોર્પોરેશનનું માનવું છે કે વધારાના સ્ટાફથી અરજદારોની સંખ્યાને પહોંચી વળવામાં સરળતા રહેશે.
વચેટીયા પ્રથા અટકાવવા માટે ટોકન સિસ્ટમ અમલમાં મૂકવામાં આવી હોવાનું તંત્રનો દાવો છે. જોકે, સવારે મર્યાદિત સમય દરમિયાન જ ટોકન આપવાની વ્યવસ્થા અને રોજના માત્ર 60 ટોકનની મર્યાદાને કારણે કેટલાક નાગરિકોએ અસુવિધા અંગે પણ ફરિયાદો વ્યક્ત કરી છે.
દર ગુરુવારે રાવપુરા સ્થિત ગુમાસ્તા ધારાની કચેરીમાં પણ આધાર કાર્ડની કામગીરી કરવામાં આવે છે. GPS આધારિત સિસ્ટમને કારણે અહીં અન્ય વોર્ડના ઓપરેટરોની મદદ લઈને પણ કામગીરી કરવામાં આવે છે.
નવી કીટ અને વધતી સુવિધાઓથી આધાર કાર્ડ સંબંધિત સેવાઓમાં ઝડપ અને પારદર્શિતા વધશે તેવી આશા વ્યક્ત કરવામાં આવી રહી છે, જોકે નાગરિકોને વાસ્તવમાં કેટલી રાહત મળે છે તે આગામી સમયમાં સ્પષ્ટ થશે.
