નેશનલ ટેસ્ટિંગ એજન્સી (NTA) દ્વારા દેશભરમાં યોજાનારી મેડિકલ પ્રવેશ પરીક્ષા NEET UG 2026 ને લઈને ગુજરાત પોલીસ સજ્જ થઈ ગઈ છે. રાજ્યમાં પરીક્ષા એકદમ શાંતિપૂર્ણ, સુરક્ષિત અને પારદર્શક માહોલમાં સંપન્ન થાય તે માટે રાજ્ય પોલીસ તંત્ર દ્વારા અભેદ્ય સુરક્ષા ચક્ર ગોઠવવામાં આવ્યું છે. પ્રશ્નપત્રોને કેન્દ્ર સુધી પહોંચાડવાથી લઈને પરીક્ષા બાદ આન્સર શીટ સુરક્ષિત પરત લાવવા સુધીની તમામ પ્રક્રિયા પર પોલીસ કડક નજર રાખશે.
વિદ્યાર્થીઓને કેન્દ્ર સુધી પહોંચવામાં નહીં પડે મુશ્કેલી: IGP મકરંદ ચૌહાણ
લો એન્ડ ઓર્ડરના આઈજીપી (IGP) શ્રી મકરંદ ચૌહાણે આ અંગે વિગતો આપતા જણાવ્યું હતું કે, પરીક્ષાના સફળ આયોજન માટે ગુજરાત પોલીસ, કેન્દ્ર અને રાજ્ય સરકારના શિક્ષણ વિભાગ તેમજ NTA સાથે સતત સંપર્કમાં છે.
-
ટ્રાફિક મેનેજમેન્ટ: વિદ્યાર્થીઓ બસ, ટ્રેન કે પોતાના ખાનગી વાહનો દ્વારા કોઈપણ જાતની અડચણ વગર સમયસર પરીક્ષા કેન્દ્ર પર પહોંચી શકે તે માટે ખાસ ટ્રાફિક વ્યવસ્થા કરવામાં આવી છે.
-
ક્રાઉડ મેનેજમેન્ટ: પરીક્ષા કેન્દ્રોની બહાર વાલીઓ કે અન્ય લોકોની બિનજરૂરી ભીડ ન થાય તે માટે તમામ જિલ્લા અને સિટી પોલીસ યુનિટ્સને કડક દિશાનિર્દેશો આપવામાં આવ્યા છે.
પેપર લીક અને ડમી કેન્ડિડેટ્સ અટકાવવા કડક પ્રોટોકોલ
પરીક્ષામાં કોઈ પણ પ્રકારની ગેરરીતિ કે ચોરીની ઘટના ન બને તે માટે પોલીસ તંત્ર દ્વારા ખાસ વ્યુહરચના તૈયાર કરવામાં આવી છે:
-
ચુસ્ત બંદોબસ્ત: પ્રશ્નપત્રોના ટ્રાન્સપોર્ટેશન અને પરીક્ષા બાદ આન્સર શીટના કલેક્શન માટે ચુસ્ત પોલીસ પ્રોટોકોલ નક્કી કરાયો છે.
-
કડક ચેકિંગ: પરીક્ષા કેન્દ્રો પર વિદ્યાર્થીઓનું સઘન ચેકિંગ કરવામાં આવશે જેથી કોઈ ડમી કેન્ડિડેટ (બીજાના નામે પરીક્ષા આપનાર) પરીક્ષામાં બેસી ન જાય.
અફવાઓ ફેલાવનારા ખેરખાંઓ સાવધ: સાયબર સેલ રાખશે વોચ
સોશિયલ મીડિયા પર કડક મોનિટરિંગ: પરીક્ષા દરમિયાન વોટ્સએપ, ફેસબુક કે અન્ય મેસેજિંગ એપ્સ પર પેપર લીક કે અન્ય કોઈ ભ્રામક અફવાઓ ન ફેલાય તે માટે ‘સાયબર સેન્ટર ઓફ એક્સલન્સ’ દ્વારા સોશિયલ મીડિયા પર સતત વોચ રાખવામાં આવી રહી છે. ખોટી અફવા ફેલાવનારાઓ સામે કાયદેસરના કડક પગલાં લેવાશે.
