સુખસર/ફતેપુરા: ગત તારીખ 2 મે 2026થી શાળાઓમાં ઉનાળુ વેકેશન જાહેર થતાં જ બાળકો ઘરે આવી ગયા છે. વેકેશન દરમિયાન સામાન્ય રીતે વાલીઓ માટે મોટી ચિંતા એ હોય છે કે બાળકો ઘરના સભ્યોનું કહેવું માનતા નથી. વધુ પડતો ગુસ્સો કરે છે, આળસ અનુભવે છે અને કલાકો સુધી મોબાઈલના સ્ક્રીન સામે વળગેલા રહે છે. વાલીઓની આ તમામ મૂંઝવણો અને ચિંતાઓમાંથી મુક્તિ અપાવવા માટે ગુજરાત રાજ્ય યોગ બોર્ડ દ્વારા એક પ્રશંસનીય કદમ ઉઠાવવામાં આવ્યું છે. સુખસર અને ફતેપુરા બંને તાલુકાના સેન્ટર તરીકે ભીતોડી પ્રાથમિક શાળા ખાતે 15 દિવસીય ‘સમર યોગ કેમ્પ’નું ભવ્ય ઉદ્ઘાટન કરવામાં આવ્યું છે.
તારીખ16 મે 2026થી શરૂ થયેલો આ વિશેષ કેમ્પ આગામી તારીખ 30 મે 2026 સુધી ચાલશે.જેમાં 7 થી 15 વર્ષના મોટી સંખ્યામાં કુમાર અને કન્યાઓ ઉત્સાહભેર ભાગ લઈ રહ્યા છે.
નિષ્ણાંતો દ્વારા યોગ અને સંસ્કારનું સિંચન
આ સમર કેમ્પમાં અનુભવી અને નિષ્ણાંત યોગ કોચ દ્વારા દરરોજ સવારે 7:00 થી 9:00 દરમિયાન બે કલાક સુધી બાળકોને યોગ અને પ્રાણાયામની સાથે ઉચ્ચ શિક્ષણ અને સંસ્કારોનું માર્ગદર્શન આપવામાં આવી રહ્યું છે. કેમ્પ દરમિયાન બાળકોને રોજિંદા જીવનમાં ઉપયોગી થાય તેવી મહત્વપૂર્ણ બાબતો શીખવવામાં આવી રહી છે, જેમ કે:
-
વહેલી સવારે કેવી રીતે ઊઠવું અને દિનચર્યા ગોઠવવી.
-
માતા-પિતા તથા વડીલોનું આદર-સન્માન કરવું અને તેમને પગે લાગી આશીર્વાદ લેવા.
-
જીવનમાં હંમેશા સાચું બોલવું, નિષ્ઠાવાન અને પ્રમાણિક બનવું.
-
સ્વભાવમાંથી ગુસ્સો અને આળસ કેવી રીતે દૂર કરવા.
-
યાદશક્તિમાં વધારો કરવો અને જીવન પ્રત્યે હંમેશા પોઝિટિવ (હકારાત્મક) અભિગમ રાખવો.
-
સૌથી મહત્વનું, મોબાઈલના વળગણ અને તેના દૂષણથી કેવી રીતે દૂર રહેવું.
