ઉત્તર પ્રદેશના સંભલ જિલ્લાના અસમોલી વિસ્તારના ઓવરી ગામમાં કુદરતનો એક સુખદ અને દુર્લભ ચમત્કાર જોવા મળ્યો છે. અહીં એક 24 વર્ષીય મહિલાએ પોતાની પ્રથમ ડિલિવરીમાં જ ચાર બાળકોને જન્મ આપ્યો છે. આ ઘટનાની સૌથી ખાસ અને દુર્લભ બાબત એ છે કે, આ ચારેય બાળકોનો જન્મ એક જ દિવસે નહીં, પરંતુ પાંચ દિવસના અંતરાલમાં થયો છે.
બે વર્ષની રાહ અને ચાર ગણી ખુશી
ઓવરી ગામના રહેવાસી અલીમના લગ્ન આશરે બે વર્ષ પહેલા અમીના (૨૪) સાથે થયા હતા. લગ્ન બાદથી જ આ પરિવાર તેમના પ્રથમ સંતાનની આતુરતાથી રાહ જોઈ રહ્યો હતો. પરંતુ આ પ્રતીક્ષા આટલી યાદગાર અને સુખદ હશે તેની કલ્પના અલીમના પરિવાર કે ગ્રામજનોએ ક્યારેય કરી નહોતી. જેવું ગામમાં એક સાથે બે પુત્રો અને બે પુત્રીઓના આગમનના સમાચાર ફેલાયા, અલીમના ઘરે અભિનંદન આપનારાઓની ભીડ જામી ગઈ છે.
એક અઠવાડિયાનું અંતર: એક દુર્લભ મેડિકલ કેસ
અમીનાને પ્રસૂતિની પીડા થતા 9 મેના રોજ મુરાદાબાદ સ્થિત TMU હોસ્પિટલમાં દાખલ કરવામાં આવી હતી. તબીબી દ્રષ્ટિકોણથી આ કિસ્સો ‘અત્યંત દુર્લભ’ (Extremely Rare) શ્રેણીમાં આવે છે.
-
9 મે: અમીનાએ પ્રથમ સ્વસ્થ પુત્રને જન્મ આપ્યો.
-
ત્યારબાદ ડોક્ટરોએ જોયું કે ગર્ભમાં હજુ બીજા બાળકો છે, પરંતુ પ્રસૂતિની પ્રક્રિયા અટકી ગઈ હતી.
-
પાંચ દિવસ પછી: અમીનાએ અન્ય ત્રણ બાળકોને જન્મ આપ્યો, જેમાં એક પુત્ર અને બે પુત્રીઓનો સમાવેશ થાય છે.
