કેન્દ્ર સરકારના એક ચોંકાવનારા અને કડક આર્થિક નિર્ણયે દેશના બુલિયન માર્કેટમાં ભૂકંપ લાવી દીધો છે. રૂપિયાના મૂલ્યને સ્થિર કરવા અને વિદેશી હૂંડિયામણ ભંડાર પરનું દબાણ ઘટાડવા માટે સરકારે સોના-ચાંદીની આયાત જકાત (Import Duty) માં ધરખમ વધારો કર્યો છે. આ જાહેરાતના પગલે જ સોના અને ચાંદીના ભાવમાં રાતોરાત એવો ભડકો થયો છે કે સામાન્ય જનતા માટે હવે ઘરેણાં ખરીદવા એક સ્વપ્ન સમાન બની ગયા છે.
MCX પર રેકોર્ડબ્રેક તેજી: સોનું 1.64 લાખની સપાટીએ મલ્ટી કોમોડિટી એક્સચેન્જ (MCX) પર સોનાના ભાવમાં ઐતિહાસિક ઉછાળો જોવા મળ્યો છે. કારોબારી સત્ર દરમિયાન સોનું પ્રતિ 10 ગ્રામ ₹11,055 વધીને ₹1,64,497 ના સ્તર પર પહોંચી ગયું હતું. બજાર ખુલતી વખતે જે સોનું ₹1,54,851 પર હતું, તેમાં ટૂંકા ગાળામાં આવેલા આ ધરખમ ઉછાળાએ રોકાણકારોને પણ સ્તબ્ધ કરી દીધા છે.
ચાંદીમાં ‘કરંટ’: 1 કિલોનો ભાવ ₹3 લાખને પાર સોના કરતાં પણ વધુ આઘાતજનક તેજી ચાંદીમાં જોવા મળી છે. વાયદા બજારમાં ચાંદીની કિંમત પ્રતિ કિલોગ્રામ ₹22,367 ઉછળીને ₹3,01,429 પર પહોંચી ગઈ છે. ભારતીય બજારના ઇતિહાસમાં પ્રથમ વખત ચાંદીએ 3 લાખ રૂપિયાની મનોવૈજ્ઞાનિક સપાટી વટાવી છે.જેના કારણે જ્વેલરી ઉદ્યોગમાં ફફડાટ વ્યાપી ગયો છે.
સરકારે કેમ લીધો આ કડક નિર્ણય? બજારના નિષ્ણાતોના મતે, કેન્દ્ર સરકારે આયાત ડ્યુટી 6% થી વધારીને સીધી 15% કરી દીધી છે. આ પાછળના મુખ્ય કારણો નીચે મુજબ છે:
-
વિદેશી હૂંડિયામણની બચત: સોનાની આયાત ઘટાડીને ડોલરના આઉટફ્લોને રોકવો.
-
રૂપિયાનું મૂલ્ય: આંતરરાષ્ટ્રીય બજારમાં ઘટતા જતાં રૂપિયાને ટેકો આપવો.
-
આંતરરાષ્ટ્રીય પરિબળો: વૈશ્વિક સ્તરે ડોલર ઇન્ડેક્સમાં થયેલો ફેરફાર પણ આ તેજીમાં તેલ હોમવાનું કામ કરી રહ્યો છે.
