છોટાઉદેપુરના જિલ્લાના ધમોડી ગામે રાજકીય કિન્નાખોરીનો એક અત્યંત ગંભીર કિસ્સો સામે આવ્યો છે.ચૂંટણીમાં હાર-જીતની અદાવત રાખીને જાહેર માર્ગને નુકસાન પહોંચાડવામાં આવતા સમગ્ર પંથકમાં ચકચાર મચી ગઈ છે.
ચૂંટણીની અદાવતમાં જાહેર મિલકતને નુકસાન
મળતી માહિતી મુજબ, મોટી સઢલી જિલ્લા પંચાયત હેઠળ આવતા ધમોડી ગામે લોકશાહીના પર્વ બાદ હવે જૂની અદાવતો બહાર આવી રહી છે. ગ્રામજનોનો સીધો આક્ષેપ છે કે, ચૂંટણીના પરિણામોની અદાવત રાખીને ભાજપના કાર્યકરો દ્વારા ગામનો પાકો RCC રસ્તો ખોદી નાખવામાં આવ્યો છે..જેના કારણે ગામમાં અવરજવર કરતા લોકો અને વાહનચાલકો ભારે મુશ્કેલીમાં મુકાયા છે.
ડર અને ધમકીના વાતાવરણ વચ્ચે પ્રાંત અધિકારીને રજૂઆત
માત્ર સરકારી રસ્તો જ નથી તોડવામાં આવ્યો, પરંતુ સ્થાનિકોએ આવેદનપત્રમાં ગંભીર આરોપ લગાવ્યો છે કે, ગ્રામજનોને માનસિક રીતે હેરાન કરવામાં આવી રહ્યા છે અને ડર તથા ધમકીનું વાતાવરણ ઉભું કરવામાં આવ્યું છે.
આ ગુંડાગીરી સામે અવાજ ઉઠાવવા માટે મોટી સઢલી બેઠકના વિજેતા ઉમેદવાર અને મોટી સંખ્યામાં ગ્રામજનો એકઠા થયા હતા..તમામ લોકોએ ભેગા મળીને છોટાઉદેપુર પ્રાંત અધિકારીને આવેદનપત્ર પાઠવી આ મામલે કડક તપાસ અને જવાબદારો સામે કાયદેસરની કાર્યવાહી કરવાની માંગ કરી છે.
મુખ્ય અંશો:
-
સ્થળ: ધમોડી ગામ, મોટી સઢલી બેઠક, છોટાઉદેપુર.
-
ઘટના: સરકારી RCC રસ્તો ખોદી નાખી જનતાને હાલાકીમાં મુકવામાં આવી.
-
આક્ષેપ: ચૂંટણીની હાર-જીતની અદાવતમાં ભાજપ કાર્યકરો દ્વારા ગુંડાગીરી.
-
માંગ: પ્રાંત અધિકારીને આવેદન આપી જવાબદારો સામે કાર્યવાહીની માંગ.
