ગુજરાત સરકારે આજે રાજ્યની વિધાનસભામાં ઐતિહાસિક ‘સમાન નાગરિક સંહિતા‘ (UCC) બિલ 2026 રજૂ કરીને એક નવો અધ્યાય શરૂ કર્યો છે. ઉત્તરાખંડ પછી ગુજરાત દેશનું બીજું એવું રાજ્ય બન્યું છે જેણે તમામ ધર્મો માટે સમાન કાયદાની દિશામાં મક્કમ ડગલું ભર્યું છે. મુખ્યમંત્રી ભૂપેન્દ્ર પટેલે 209 પાનાનું આ વિસ્તૃત બિલ ગૃહમાં રજૂ કર્યું હતું. જેને નાયબ મુખ્યમંત્રી હર્ષ સંઘવીએ ગુજરાતના ઇતિહાસનો ‘સોનેરી દિવસ‘ ગણાવ્યો છે.
બિલની મુખ્ય વિશેષતાઓ અને મોટા ફેરફારો
આ પ્રસ્તાવિત કાયદો લગ્ન, છૂટાછેડા, વારસો અને લિવ-ઇન સંબંધો જેવા નાગરિક વિષયોમાં તમામ ધર્મોના લોકો માટે એકસમાન નિયમો લાગુ કરશે:
-
લગ્ન અને છૂટાછેડા: તમામ ધર્મોમાં લગ્નની નોંધણી (Registration) ફરજિયાત બનશે. લગ્ન માટે પુરુષની ઉંમર 21 વર્ષ અને સ્ત્રીની ઉંમર 18 વર્ષ હોવી અનિવાર્ય છે.
-
બહુપત્નીત્વ પર પ્રતિબંધ: એકથી વધુ લગ્ન કરવા પર સંપૂર્ણ પ્રતિબંધ મૂકવામાં આવ્યો છે. જે સ્ત્રીઓના સન્માન અને ન્યાય માટે મોટું પગલું ગણાય છે.
-
લિવ-ઇન રિલેશનશિપ: લિવ-ઇન સંબંધોમાં રહેતા યુગલો માટે રજિસ્ટ્રેશન ફરજિયાત રહેશે. નોંધણી કરવામાં નિષ્ફળ રહેનાર સામે દંડ અને કાયદાકીય કાર્યવાહીની જોગવાઈ છે.
-
વારસા હક: મિલકત અને વારસાના અધિકારોમાં સ્ત્રી અને પુરુષ બંનેને સમાન દરજ્જો આપવામાં આવશે.
