ઓડિશામાં મોટી દુર્ઘટના: સરકારી હોસ્પિટલના ICU વોર્ડમાં લાગી આગ, 10 દર્દીઓના મોત

ઓડિશાના કટકમાં આવેલી SCB (એસસીબી) મેડિકલ કોલેજ અને હોસ્પિટલમાં સોમવારે વહેલી સવારે ભીષણ આગ ફાટી નીકળી હતી. આગ હોસ્પિટલના ICU વોર્ડમાં લાગી હતી, જેના કારણે વોર્ડમાં દાખલ આશરે 10 દર્દીઓના મોત થયા છે. મુખ્યમંત્રી મોહન ચરણ માઝીએ પોતે આ દુર્ઘટનાની પુષ્ટિ કરી છે અને મીડિયાને માહિતી આપી છે. તેમણે આ ઘટનાની ઉચ્ચ સ્તરીય તપાસ કરી રિપોર્ટ સોંપવાનો આદેશ જાહેર કર્યો છે. સાથે જ મૃતકોના પરિજનો માટે 25 લાખ રૂપિયાના વળતરની જાહેરાત કરી છે.

મુખ્યમંત્રીએ મૃતકોના પરિજનો સાથે મુલાકાત કરી

મુખ્યમંત્રી માઝીએ જણાવ્યું કે હોસ્પિટલમાં આગ લાગવાના સમાચાર મળતા જ તેઓ હોસ્પિટલ પહોંચ્યા હતા અને અકસ્માતમાં ઘાયલ થયેલા દર્દીઓની મુલાકાત લીધી હતી. તેમણે મૃતકોના પરિવારજનોને મળીને સાંત્વના આપી હતી. પૂછપરછમાં જાણવા મળ્યું છે કે હોસ્પિટલમાં ટ્રોમા સેન્ટર ખાતે બનેલા ICU વોર્ડમાં આગ લાગી હતી અને સવારે લગભગ 3 વાગ્યે ધુમાડો નીકળતો જોવા મળ્યો હતો. એર કન્ડીશનીંગ સિસ્ટમમાં શોર્ટ સર્કિટના કારણે આગ લાગી હોવાની આશંકા છે. ICU વોર્ડ ટ્રોમા સેન્ટરના પહેલા માળે છે, જેમાં અંદાજે 23 દર્દીઓ હતા.

આગના ધુમાડામાં ગૂંગળામણને કારણે મોતની આશંકા

મુખ્યમંત્રી માઝીએ જણાવ્યું કે આગ લાગવાની ખબર મળતા જ હોસ્પિટલ સિક્યુરિટી, પોલીસ અને ફાયર બ્રિગેડ ઘટનાસ્થળે પહોંચી ગઈ હતી, પરંતુ બચાવ કામગીરી શરૂ થાય તે પહેલા જ 7 દર્દીઓના મોત થઈ ચૂક્યા હતા. આગના ધુમાડામાં ગૂંગળામણ થવાને કારણે અન્ય 3 દર્દીઓએ દમ તોડી દીધો હતો. અન્ય દર્દીઓ, જેઓ આગમાં દાઝી ગયા હતા, તેમને રેસ્ક્યુ કરી લેવામાં આવ્યા છે અને તેમની સારવાર ચાલી રહી છે. આગ લાગવાને કારણે ICU વોર્ડમાં ધુમાડો ફેલાઈ ગયો હતો, જેનાથી લોકોમાં ગભરાટ પણ ફેલાઈ ગયો હતો.

મુખ્યમંત્રી માઝીએ અકસ્માતની તપાસના આદેશ આપ્યા

મુખ્યમંત્રીએ જણાવ્યું કે ફાયર બ્રિગેડની 3 ગાડીઓએ કલાકોની જહેમત બાદ આગ પર કાબુ મેળવ્યો હતો. 5 દર્દીઓ અને હોસ્પિટલના 2 કર્મચારીઓ ઘાયલ થયા છે, જેમની સારવાર કરવામાં આવી છે અને હવે તેઓ ખતરાની બહાર છે. ઓડિશાના સ્વાસ્થ્ય સચિવ અશ્વથી એસ., કટકના જિલ્લા કલેક્ટર દત્તાત્રેય ભાઉસાહેબ શિંદે અને કટકના DCP ઋષિકેશ ખિલારી ઘટનાસ્થળે પહોંચ્યા હતા, જેમની સાથે બેઠક યોજીને સ્થિતિની સમીક્ષા કરવામાં આવી અને અકસ્માતની તપાસ કરવાના નિર્દેશ પણ આપવામાં આવ્યા છે.

SCB મેડિકલ કોલેજ અને હોસ્પિટલ વિશે

1944માં શરૂ થયેલી SCB મેડિકલ કોલેજ એન્ડ હોસ્પિટલ પૂર્વ ભારતની સૌથી જૂની અને સૌથી મોટી સરકારી હોસ્પિટલ છે. આ ઓડિશાની સૌથી મોટી રેફરલ હોસ્પિટલ છે, જ્યાં રાજ્ય અને આસપાસના વિસ્તારોમાંથી આવતા ગંભીર દર્દીઓની સારવાર કરવામાં આવે છે.