રિવાઈઝડ NAની પરવાનગીને લઈ સરકારનો નિર્ણય: પ્રિમીયમ વસૂલ થયા વિના NA થયેલ જમીન પુન: હેતુફેર માટે આવે ત્યારે પ્રવર્તમાન જંત્રી કિંમતના 30 ટકાને બદલે 10 ટકા વસૂલ કરીને હેતુફેર કરાશે
રાજ્યમાં રિવાઈઝડ NAની પરવાનગીને લઈ મહત્વનો નિર્ણય લેવાયો છે. રિવાઈઝડ NAની પરવાનગીની પ્રક્રિયામાં પારદર્શિતા લાવવા રાજ્ય સરકારે આ નિર્ણય લીધો છે. પ્રવર્તમાન જંત્રી કિંમતના 30 ટકાને બદલે 10 ટકા વસૂલ કરીને હેતુફેર કરાશે
રિવાઈઝડ NAની પરવાનગીને લઈ નિર્ણય
રાજ્યમાં કોઈ પણ હેતુ માટે અગાઉ N.A. થયેલી જમીનની કોઈપણ દરખાસ્ત પુન: હેતુફેર માટે જિલ્લા કલેકટર સમક્ષ રજૂ થાય ત્યારે જો પ્રિમીયમ વસુલાત પાત્ર હોય અને અગાઉના બિનખેતીના નિર્ણય વખતે પ્રિમિયમ વસૂલ કરવાનું રહી ગયું હોય તેવા કિસ્સામાં હાલ આવું પ્રિમીયમ પ્રવર્તમાન જંત્રી દરના 30 ટકા પ્રમાણે વસૂલ કરવાની પ્રથા અમલમાં છે. મુખ્યમંત્રી ભૂપેન્દ્ર પટેલ સમક્ષ આ સંદર્ભમાં સમાજના વિવિધ વર્ગો દ્વારા થયેલી રજૂઆતોનો સકારાત્મક પ્રતિસાદ આપતાં તેમણે મહેસુલ વિભાગને દિશા નિર્દેશો આપ્યા છે.
આ પણ વાંચો: ખ્યાતિ નર્સિંગ કોલેજ થશે બંધ? હોસ્પિટલ કાંડમાં તપાસ કેટલે પહોંચી, જાણો તમામ અપડેટ
પ્રક્રિયામાં પારદર્શિતા લાવવા માટે નિર્ણય
તદઅનુસાર, મુખ્યમંત્રી ભૂપેન્દ્ર પટેલે એવો નિર્ણય કર્યો છે કે, ભૂતકાળમાં પ્રતિબંધિત સત્તા પ્રકાર અને નવી અને અવિભાજ્ય શરતની જમીનમાં પ્રિમીયમની રકમ વસુલવાપાત્ર હતી પણ તે રકમ વસુલ લીધા વિના બિનખેતી પરવાનગી આપવામાં આવેલ છે તેવી જમીનમાં હાલના અરજદાર/કબ્જેદાર પાસેથી પ્રવર્તમાન જંત્રી કિંમતના 10% પ્રિમીયમની રકમ વસુલ કરીને રીવાઈઝ્ડ બિનખેતીની પરવાનગી આપવાની રહેશે. એટલું જ નહીં, જે કિસ્સાઓમાં પ્રિમીયમ વસૂલાતનો અગાઉ નિર્ણય થઈ ગયેલો હોય તેવા કિસ્સાઓમાં આ નિર્ણય લાગુ કરવામાં આવશે નહીં. મુખ્યમંત્રીના આ નિર્ણયને પરિણામે રાજ્યમાં રિવાઈઝડ બિન ખેતી પરવાનગીની પ્રક્રિયામાં પારદર્શિતા તથા ત્વરિતતા આવશે તેમજ રિડેવલપમેન્ટ પ્રક્રિયાને પણ વેગ મળશે.
