રાજકોટના ગોંડલ રોડ ચોકડીએ રિક્ષામાં બેઠેલા મેંદરડાના રિક્ષાચાલકને રાજકોટની રીક્ષા ગેંગે શિકાર બનાવી 40 હજારની રોકડ ચોરી લેતા આ મામલે માલવિયાનગર પોલીસમાં ફરિયાદ નોંધાઈ છે. મેંદરડાના રિક્ષાચાલક રાજકોટ આવ્યા બાદ આ રિક્ષાચાલકને જ રિક્ષા ગેંગે શિકાર બનાવ્યા હતાં.
મેંદરડાના આંબાળા ગામે રહેતા રિક્ષા ચાલક નરેન્દ્રભાઈ જેઠાભાઈ મકવાણા કામ સબબ રાજકોટ આવ્યા હતાં. ગોંડલ રોડ ચોકડીએ બસમાંથી ઉતરી તેમના બહેન ગોંડલ રોડ પાસે આવેલ નર્મદ ટાઉનશીપમાં રહેતા લીલાવતીબેન સાવલિયાના ઘરે જવા માટે તેઓ રિક્ષાની રાહ જોઈને ઉભા હતા ત્યારે એક રિક્ષા તેમની પાસે આવીને ઉભી રહી હતી અને તેમને મુસાફર તરીકે બેસાડી રિક્ષાચાલકે રિક્ષા હંકારી ત્યાથી થોડે દૂર ગયા બાદ રિક્ષામાં બેઠેલા અન્ય બે શખ્સોમાંથી એક શખ્સે કહ્યું કે મારો પગ દુખે છે તમે સેજ સાઈડમાં હટી જાવ જેથી નરેન્દ્રભાઈ રિક્ષામાંથી થોડે દૂર બેઠા બાદ રિક્ષા ચાલકે રિક્ષા ઉભી રાખી મારે આગળ જવું નથી તમે ઉતરી જાવ તેવુ કહી અટિકા ફાટક પાસે ઉતારી ભાડુ માગ્યા વગર જતો રહ્યો હતો. નરેન્દ્રભાઈએ પોતાની પાસે રહેલી થેલી જેમાં 40 હજાર રોકડા અને આધાર કાર્ડ હતા તે તપાસ કરતા જોવા નહીં મળતા રિક્ષાચાલક ગેંગનો પોતે શિકાર બન્યાનું જાણવા મળતા આ અંગે માલવિયા નગર પોલીસમાં ફરિયાદ નોંધાવી છે. માલવિયાનગર પોલીસે સીસીટીવી ફૂટેજના આધારે વધુ તપાસ શરૂ કરી છે.
