શનિવારની રાત્રે ઈન્ડિગોની એક ફ્લાઈટમાં બનેલી ચોંકાવનારી ઘટનાએ વિમાનમાં સવાર તમામ મુસાફરોને ફફડાવી દીધા હતા.વિમાનમાં ત્યારે અફરાતફરી મચી ગઈ જ્યારે એક મુસાફર લેન્ડિંગના થોડા સમય પહેલા જ ઈમરજન્સી એક્ઝિટ ડોર ખોલવાનો પ્રયાસ કરવા લાગ્યો..જ્યારે તેને રોકવામાં આવ્યો અને અધિકારીઓને સોંપવામાં આવ્યો..ત્યારે તેણે પોતાના બચાવમાં કંઈક એવું કહ્યું જેના પર ભાગ્યે જ કોઈ વિશ્વાસ કરશે.
આ ઘટના બેંગલુરુથી વારાણસી આવી રહેલી ફ્લાઈટ 6E-185 માં બની હતી. જેમાં મોહમ્મદ અદનાન નામના મુસાફરે બે વાર વિમાનનો ઈમરજન્સી દરવાજો ખોલવાનો પ્રયાસ કર્યો હતો.
ટેકઓફ પછી તરત જ અદનાને છેડછાડ શરૂ કરી
મળતી માહિતી મુજબ, ફ્લાઈટ બેંગલુરુથી રાત્રે લગભગ 8:15 વાગ્યે ઉડી હતી. મુસાફરોમાં ઉત્તરપ્રદેશના મઉ જિલ્લાનો રહેવાસી મોહમ્મદ અદનાન પણ સવાર હતો. અધિકારીઓના જણાવ્યા અનુસાર, ઉડાન શરૂ થયાની માત્ર 15 મિનિટ બાદ જ અદનાને ઈમરજન્સી ડોરના હેન્ડલ સાથે છેડછાડ શરૂ કરી દીધી હતી.કેબિન ક્રૂને જેવી આ વાતની ખબર પડી, તેમણે મુસાફરને રોક્યો અને ચેતવણી આપી કે આવી ભૂલ બીજી વાર ન કરે. અદનાને તેને ભૂલ ગણાવીને વાત ટાળી દીધી હતી.
બીજા પ્રયાસમાં વિમાન લેન્ડ થયું
બાકીની મુસાફરીમાં તેનું વર્તન સામાન્ય રહ્યું..પરંતુ લાલ બહાદુર શાસ્ત્રી આંતરરાષ્ટ્રીય એરપોર્ટ પર લેન્ડિંગની બરાબર થોડી ક્ષણો પહેલા ફરી હંગામો થયો. રાત્રે લગભગ 10:20 વાગ્યે વિમાન જ્યારે માત્ર 500 ફૂટની ઊંચાઈ પર હતું. ત્યારે અદનાને ફરીથી દરવાજો ખોલવાનો પ્રયાસ કર્યો.
ક્રૂએ તાત્કાલિક પાયલોટને જાણ કરી. પાયલોટે ત્વરિત નિર્ણય લઈને લેન્ડિંગ રદ કર્યું અને ‘ગો-અરાઉન્ડ’ પ્રક્રિયા અપનાવી, જેના પછી વિમાન રાત્રે 10:35 વાગ્યે સુરક્ષિત રીતે નીચે ઉતર્યું.
‘ભૂત સવાર થઈ ગયું હતું’
પ્રોટોકોલ મુજબ, અદનાનને તરત જ એરલાઈન સિક્યુરિટી અને CISF ને સોંપવામાં આવ્યો હતો. પોલીસને જાણ કરીને તેની સામે ગુનો નોંધવામાં આવ્યો છે. એરપોર્ટ પર પૂછપરછ દરમિયાન અદનાને પહેલા તો કારણ જણાવવાની ના પાડી, પણ પછી કહ્યું કે તેના પર ‘ભૂત સવાર થઈ ગયું હતું‘. પોલીસ સ્ટેશન લઈ જઈને કરવામાં આવેલી કડક પૂછપરછમાં તેણે જણાવ્યું કે તે ગોવાથી રજાઓ માણીને પરત ફરી રહ્યો હતો અને તેને ખબર નહોતી કે તે હેન્ડલ ઈમરજન્સી એક્ઝિટનું છે.
