મિડલ ઇસ્ટમાં ચાલી રહેલા ભીષણ સંઘર્ષ વચ્ચે એક એવું ચિત્ર સામે આવ્યું છે જેણે સમગ્ર વિશ્વનું ધ્યાન ખેંચ્યું છે. દાયકાઓ સુધી અમેરિકી સૈન્ય હાજરીનું કેન્દ્ર રહેલા ઇરાકમાંથી વિદેશી સેનાઓની વાપસી શરૂ થઈ ગઈ છે. અમેરિકી સેનાએ અલ-અસદ એર બેઝ સહિતના મુખ્ય મથકો છોડી દીધા છે, જ્યાં તેઓ બે દાયકાથી વધુ સમયથી તૈનાત હતા. ઇરાકી સંરક્ષણ મંત્રાલયે પુષ્ટિ કરી છે કે, અંતિમ અમેરિકી સલાહકારો પણ બેઝ છોડી ચૂક્યા છે અને હવે આ સ્થળો સંપૂર્ણપણે ઇરાકી સુરક્ષા દળોના નિયંત્રણમાં છે. જોકે,અર્ધ-સ્વાયત્ત કુર્દિસ્તાન ક્ષેત્રમાં હજુ પણ કેટલાક અમેરિકી સૈનિકો હાજર છે. જે સપ્ટેમ્બર 2026 સુધીમાં સંપૂર્ણપણે પરત ફરે તેવી અપેક્ષા છે.
NATO એ પણ સેના પાછી બોલાવી
આ ઘટના ઇરાકમાં લાંબા સૈન્ય સંઘર્ષનો એક નવો અધ્યાય છે. NATO એ પણ ઇરાકમાંથી તેના ટ્રેનિંગ મિશનની સેનાઓને સંપૂર્ણપણે પાછી ખેંચી લીધી છે. માર્ચ 2026 માં ઈરાન યુદ્ધના વધતા પ્રભાવને કારણે NATO એ તેના સેંકડો સૈનિકોને ઇરાકથી યુરોપમાં સ્થાનાંતરિત કર્યા છે. આ મિશન 2018 થી ઇરાકી સુરક્ષા દળોને સલાહ આપવા માટે ચાલી રહ્યું હતું. પરંતુ પ્રાદેશિક સંઘર્ષને કારણે તેને અસ્થાયી રૂપે સમાપ્ત કરવામાં આવ્યું છે. NATO હવે ઇરાકી દળોને ઇટાલીના નેપલ્સ સ્થિત હેડક્વાર્ટરથી દૂર રહીને સપોર્ટ આપશે.
જોર્ડનમાં અમેરિકી સેનાની વાપસીના વીડિયો વાયરલ
આજે સવારે વાયરલ થયેલા વીડિયોમાં જોર્ડનમાં અમેરિકી સેનાની વાપસી અથવા પુનઃસ્થાપના (Redeployment) ના દ્રશ્યો જોવા મળ્યા છે.જેને ઇરાકી નાગરિકોએ રેકોર્ડ કર્યા છે. ઈરાન સમર્થિત ઇરાકી મિલિશિયા જૂથોએ અમેરિકી બેઝ પર દબાણ જાળવી રાખ્યું હતું.જેના કારણે વાપસીની પ્રક્રિયા તેજ બની છે. જોકે, “વિક્ટોરિયા બેઝ” થી 24 કલાકના યુદ્ધવિરામ જેવી કોઈ ચોક્કસ ઘટનાની પુષ્ટિ થઈ નથી.પરંતુ મિલિશિયાના હુમલાઓએ પ્રાદેશિક ગતિશીલતાને અસર કરી છે.
ઈરાન યુદ્ધની અસર
ઈરાન યુદ્ધે ઇરાકમાં અમેરિકા અને NATO ની હાજરીને સમાપ્ત કરવામાં પરોક્ષ ભૂમિકા ભજવી છે. ઈરાનની સંસદના સ્પીકર મોહમ્મદ બાગેર ગલિબાફે કહ્યું છે કે, પ્રાદેશિક સુરક્ષા હવે અમેરિકા વિના પ્રાદેશિક દેશો દ્વારા સ્થાપિત કરવામાં આવશે અને અમેરિકી સેનાની હાજરી એક ખતરો છે. આ વાપસીને ઇરાકની સાર્વભૌમત્વને મજબૂત કરતું પગલું માનવામાં આવે છે. પરંતુ કુર્દિશ ક્ષેત્રમાં મર્યાદિત અમેરિકી હાજરી ચાલુ રહેવાથી ભવિષ્યમાં ફેરફારો શક્ય છે.
કુર્દિશ વિસ્તારોમાં હાજરી
અહેવાલ મુજબ, ઇરાકના લગભગ તમામ વિસ્તારોમાંથી સેના હટી ગઈ છે. પરંતુ ઉત્તરમાં આવેલા કુર્દિશ વિસ્તારોમાં હજુ પણ કેટલીક અમેરિકી ટુકડીઓની હાજરી છે. ઈરાન સમર્થિત ઇરાકી મિલિશિયાએ બગદાદના વિક્ટોરિયા બેઝ પરથી અમેરિકી સૈનિકોની સુરક્ષિત અને સંપૂર્ણ વાપસી સુનિશ્ચિત કરવા માટે 24 કલાકના યુદ્ધવિરામની જાહેરાત કરી છે.
