Bharat Parv 2026: આસામના ઈકો-ફ્રેન્ડલી મુખોટાઓએ પ્રવાસીઓનું જીત્યું મન, જાણો તેની અદભુત 600 વર્ષ જૂની ઈતિહાસગાથા
નર્મદા જિલ્લાના રાજપીપળા ખાતે આયોજિત ભવ્ય ‘ભારત પર્વ’ માં આસામની સમૃદ્ધ લોકસંસ્કૃતિ અને પરંપરાગત કળાનો અનોખો સંગમ જોવા મળી રહ્યો છે. અહીં પ્રદર્શિત કરવામાં આવેલા આસામના રંગબેરંગી અને આકર્ષક પરંપરાગત મુખોટાઓ (માસ્ક) દેશભરમાંથી આવેલા પ્રવાસીઓ માટે ભારે આકર્ષણનું કેન્દ્ર બન્યા છે.
આસામના મુખોટા કળાની મુખ્ય વિગતો અને વિશેષતાઓ:
-
૬૦૦ વર્ષ જૂનો ઐતિહાસિક વારસો: આસામના શિવસાગરના મુખોટા કલાકાર સુજિત બરુઆહ ના જણાવ્યા મુજબ, આ ૧૫મી સદીની આશરે ૬૦૦ વર્ષ જૂની પરંપરાગત કળા છે, જેની શરૂઆત મહાપુરુષ શ્રીમંત શંકરદેવે કરી હતી.
-
સંપૂર્ણ ઈકો-ફ્રેન્ડલી નિર્માણ: આ મુખોટાઓની સૌથી મોટી ખાસિયત એ છે કે તે સંપૂર્ણપણે કુદરતી સામગ્રીમાંથી બને છે. તેના નિર્માણમાં વાંસ, માટી, ગાયનું છાણ અને કાપડનો ઉપયોગ થાય છે.
-
ધાર્મિક અને સાંસ્કૃતિક મહત્ત્વ: રામાયણ, શ્રીકૃષ્ણની રાસલીલા અને આસામના પરંપરાગત ધાર્મિક નાટ્યપ્રયોગો જેવા કે ‘ભાઓના’ અને ‘અંકિયા નાટ’ ના પૌરાણિક પાત્રોને જીવંત કરવા માટે આ મુખોટા તૈયાર કરવામાં આવે છે.
-
આધુનિક અભિગમ અને ઇનોવેશન: પદ્મશ્રી રેબાકાંત મહંતાના માર્ગદર્શન હેઠળ તાલીમ મેળવનાર સુજિત બરુઆહ પોતાની ‘બાર્ના કુટિર આર્ટ એકેડમી’ દ્વારા નવા યુવાનોને તાલીમ આપી રહ્યા છે. તેમણે આ કળાને આધુનિક બજાર સાથે જોડવા મિનીએચર મુખોટા, નામસિંહની નાની પ્રતિકૃતિઓ, મુખોટા ફ્રિજ મેગ્નેટ અને કેનવાસ પેઇન્ટિંગ્સ બનાવવાનું શરૂ કર્યું છે.
પરંપરાગત વારસાને ઘરની સજાવટ અને હોમ ડેકોર સુધી પહોંચાડવાના આ અનન્ય પ્રયાસથી ભારત પર્વની મુલાકાતે આવેલા પ્રવાસીઓ અને બાળકો ભારે અભિભૂત થયા છે.
