ભાવનગરના મીઠાઈ-ફરસાણના પાંચ વેપારી પેકેજ કોમોડીટી રૃલ્સનાં ભંગ બદલ દંડાયા
ગ્રાહકોને સુરક્ષા પૂરી પાડતા તોલમાપ વિભાગ દ્વારા આગામી દિવાળીના તહેવારોને ધ્યાનમાં રાખીને ભાવનગર શહેરમાં વિવિધ વિસ્તારોમાં સઘન ચેકિંગ હાથ ધરવામાં આવ્યું હતું. આ ખાસ ઝુંબેશ દરમિયાન પેકેજ કોમોડીટી રૃલ્સનું ઉલ્લંઘન કરનાર ૫ મીઠાઈ-ફરસાણના વેપારીઓ તેમજ નિયત સમયમાં વજનકાંટાનું મુદ્રાંકન (સ્ટેમ્પિંગ) ન કરાવનાર વેપારીઓ સામે કડક કાર્યવાહી કરીને કુલ રૂ. ૪૬,૫૦૦ નો દંડ વસૂલવામાં આવ્યો છે.
તપાસ અને દંડકીય કાર્યવાહીની મુખ્ય વિગતો:
-
પેકેજ કોમોડીટી રૃલ્સનો ભંગ: શહેરના વિવિધ વિસ્તારોમાં મીઠાઈ અને ફરસાણનું ઉત્પાદન, પેકિંગ અને વેચાણ કરતા એકમોની ‘ધી લીગલ મેટ્રોલોજી એક્ટ’ અને ‘ધી પેકેજ કોમોડીટી રૂલ્સ’ અન્વયે તપાસ કરાઈ હતી. પેકિંગમાં વેચાતી મીઠાઈ-ફરસાણ માટે જરૂરી ‘પેકર-રજીસ્ટ્રેશન’ ન કરાવનાર ૫ મીઠાઈ-ફરસાણના વેપારીઓ સામે કાયદેસરની કાર્યવાહી કરવામાં આવી હતી.
-
વજનકાંટાની ચકાસણી વગર વપરાશ: વજનકાંટાનું નિયત સમયમાં મુદ્રાંકન કે ચકાસણી કરાવ્યા વગર તેનો ઉપયોગ કરતા ૪ મીઠાઈ-ફરસાણના વેપારીઓ તેમજ કરીયાણા, ખીરું, મોલ અને પરચુરણ વેપારીઓ સહિત કુલ ૮ વેપારીઓ સામે દંડનીય પગલાં લેવાયા હતા. આમ કુલ ૧૭ વેપારીઓ પાસેથી રૂ. ૪૬,૫૦૦ નો દંડ વસૂલાયો છે.
-
સરકારી આવક અને નિરીક્ષણ: જિલ્લાના વિવિધ વેપારીઓના વાર્ષિક અને દ્વિવાર્ષિક ચકાસણી પાત્ર ૧,૪૪૮ વજન-માપના સાધનોની ખરાઈ કરવામાં આવી હતી. આ પ્રક્રિયા અંતર્ગત ગત એક માસમાં ફી પેટે સરકારને રૂ. ૪,૧૧,૭૭૦ ની આવક થઈ છે, જ્યારે લેટ ફી પેટે રૂ. ૧૯,૬૩૮ વસૂલ કરવામાં આવ્યા છે. તંત્ર દ્વારા આગામી દિવસોમાં પણ આ પ્રકારની ચેકિંગ ઝુંબેશ ચાલુ રાખવામાં આવશે.
