ગાંધીનગરમાં અડાલજ નજીક કાર પલટી, ગરબા રમીને આવતી બે યુવતી સહિત 3ના મોત
ગાંધીનગરના અડાલજ રોડ પર આવેલી મહારાજા હોટેલ નજીક દશેરા (૨૦મી ઓક્ટોબર)ની વહેલી સવારે એક અત્યંત ગમખ્વાર અકસ્માત સર્જાયો છે. ગાંધીનગરમાં નવરાત્રિના ગરબા રમીને કાર દ્વારા અમદાવાદ પરત ફરી રહેલા ચાર યુવામિત્રોની કાર સ્ટેરિંગ પરથી કાબૂ ગુમાવતા રોડ વચ્ચેના ડિવાઈડર સાથે ધડાકાભેર અથડાઈને પલટી મારી ગઈ હતી. આ ભીષણ અકસ્માતમાં MBBSના અંતિમ વર્ષમાં અભ્યાસ કરતી યુવતી સહિત ત્રણ યુવામિત્રોના કરૂણ મોત નીપજ્યા છે, જ્યારે અન્ય એક યુવકની હાલત અત્યંત ગંભીર હોવાથી હોસ્પિટલમાં સારવાર હેઠળ છે.
અકસ્માત અને ઘટનાની મુખ્ય વિગતો:
-
ઘટનાનો સમય અને સ્થળ: દશેરાની વહેલી સવારે અડાલજ રોડ પર મહારાજા હોટેલ નજીક બેકાબૂ બનેલી કાર રોડ પર પલટી ખાઈને ફંગોળાઈ ગઈ હતી. અકસ્માત એટલો ભીષણ હતો કે કારના ફાડા5 ઉડી ગયા હતા.
-
ગરબા રમીને અમદાવાદ પરત ફરતા હતા: કારમાં સવાર બે યુવકો અને બે યુવતીઓ ગાંધીનગરમાં ગરબા રમીને પરત ફરી રહ્યા હતા, તે દરમિયાન ડ્રાઈવરે કાબૂ ગુમાવતા આ દુર્ઘટના ઘટી હતી.
-
ત્રણ યુવાનોના મોત: અકસ્માતમાં સ્થળ પર જ એક યુવક અને એક યુવતીનું મોત થયું હતું, જ્યારે હોસ્પિટલમાં સારવાર દરમિયાન વધુ એક ઈજાગ્રસ્ત યુવતીએ પણ દમ તોડી દેતા કુલ મૃત્યુઆંક ત્રણ પર પહોંચ્યો છે.
-
એમબીબીએસ છાત્રાનું કરૂણ મોત: મૃતકોમાં ૨૫ વર્ષીય આસ્થા નામની યુવતી મૂળ રાજકોટની વતની હતી અને અમદાવાદમાં હોસ્ટેલમાં રહીને MBBSના છેલ્લા વર્ષમાં અભ્યાસ કરતી હતી. અન્ય મૃતકોની ઓળખ મેળવવાની તજવીજ પોલીસે હાથ ધરી છે.
-
પોલીસ કાર્યવાહી: ઘટનાની જાણ થતાં જ પોલીસ અને સ્થાનિક લોકો તાત્કાલિક દોડી આવ્યા હતા અને ઇજાગ્રસ્તોને હોસ્પિટલ ખસેડ્યા હતા. પોલીસે ગુનો નોંધીને આગળની કાયદેસરની તપાસ હાથ ધરી છે.
