જેમ્સ અને જ્વેલરીની નિકાસમાં ૧૮ ટકાની શાનદાર વૃદ્ધિ: વૈશ્વિક અનિશ્ચિતતા વચ્ચે સપ્ટેમ્બરમાં સાનુકૂળ સ્થિતિ

જેમ્સ જ્વેલરીની નિકાસમાં ૧૮ ટકા વૃદ્ધિ

વૈશ્વિક વેપાર ક્ષેત્રે પ્રવર્તતી અનિશ્ચિતતાઓ વચ્ચે ભારતમાંથી જેમ અને જ્વેલરીની નિકાસમાં સપ્ટેમ્બર મહિનામાં સારો સંતોષકારક વધારો જોવા મળ્યો છે. જેમ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) દ્વારા જારી કરવામાં આવેલા આંકડાઓ અનુસાર, ગત મહિને ડૉલરની દ્રષ્ટિએ નિકાસ વાર્ષિક ધોરણે ૯.૪૩ ટકા વધીને ૨.૯૫ અબજ ડૉલર રહી હતી, જ્યારે ભારતીય રૂપિયાની દ્રષ્ટિએ નિકાસ ૧૮.૨૪ ટકાના ઉછાળા સાથે ૨૮,૧૫૭.૫૫ કરોડ રૂપિયા નોંધાઈ હતી. અગાઉ ૨૦૨૫ના સપ્ટેમ્બરમાં આ નિકાસ ડૉલરની દ્રષ્ટિએ ૨.૭૦ અબજ ડૉલર અને રૂપિયાની દ્રષ્ટિએ ૨૩,૮૧૩.૯૧ કરોડ રૂપિયા રહી હતી.

નિકાસ અને બજાર અંગેની મુખ્ય વિગતો:

• છ માસિક પ્રદર્શન (એપ્રિલ-સપ્ટેમ્બર): ચાલુ નાણાકીય વર્ષના એપ્રિલથી સપ્ટેમ્બર દરમિયાન જેમ અને જ્વેલરીની કુલ નિકાસ ડૉલરની દ્રષ્ટિએ ૩.૦૭ ટકા વધીને ૧૪.૩૦ અબજ ડૉલર અને રૂપિયાની દ્રષ્ટિએ ૧૩.૪૦ ટકા વધીને ૧,૩૬,૦૬૮.૨૭ કરોડ રૂપિયા રહી છે.

• કઈ પ્રોડક્ટ્સની માંગ વધારે?: વૈશ્વિક બજારમાં ખાસ કરીને સ્ટડેડ ગોલ્ડ જ્વેલરી (જડેલા દાગીના), ચાંદીની જ્વેલરી અને પોલિશ્ડ લેબ ગ્રોન ડાયમંડ (LGD) ની વિદેશમાં ઊંચી માગ જોવા મળી રહી છે, જેના કારણે આ સેક્ટરને મોટું પ્રોત્સાહન મળ્યું છે.

• સ્ટડેડ જ્વેલરીમાં જોરદાર ઉછળો: એપ્રિલથી સપ્ટેમ્બર દરમિયાન સ્ટડેડ ગોલ્ડ જ્વેલરીની નિકાસ ૩૧.૩૧ ટકા વધીને ૩.૬૯ અબજ ડૉલર પર પહોંચી છે. ભારત-યુકે વચ્ચે વેપાર કરાર અને અમેરિકા દ્વારા ટેરિફમાં ઘટાડાનો આ ક્ષેત્રને મોટો લાભ મળી રહ્યો છે. આ ઉપરાંત હોંગકોંગ, સિંગાપુર અને ફ્રાન્સ જેવા મુખ્ય બજારોમાં પણ મજબૂત કામગીરી રહી છે.

• સોનાના ભાવમાં વધારો અને અસર: ચાલુ નાણાકીય વર્ષના પ્રથમ છ મહિનામાં સોનાના વૈશ્વિક ભાવ ૩૧.૧૭ ટકા વધીને પ્રતિ ઔંસ ૪,૪૧૫.૭૦ ડૉલર રહ્યા હતા. ભાવમાં થયેલા આ વધારાને કારણે સોનાની સાદી જ્વેલરીની નિકાસ ૮.૮૦ ટકા ઘટીને ૨.૫૩ અબજ ડૉલર રહી છે, કેમ કે મધ્ય પૂર્વ (મિડલ ઈસ્ટ) જેવા મુખ્ય બજારોમાં સ્થિતિ પડકારરૂપ રહી છે.

• ડાયમંડ અને સિલ્વર જ્વેલરી: કટ તથા પોલિશ્ડ ડાયમંડ્સની નિકાસ ૬.૯૬ ટકા વધીને ૫.૮૧ અબજ ડૉલર થઈ છે. આ ઉપરાંત પોલિશ્ડ લેબ ગ્રોન ડાયમંડ્સ અને ચાંદીના દાગીનાએ પણ બજારમાં ઉત્સાહજનક દેખાવ કર્યો છે.

કાઉન્સિલના ચેરમેન કિરિટ ભણશાળીએ જણાવ્યું હતું કે, વૈશ્વિક સ્તરે પ્રવર્તતા પડકારજનક વેપાર વાતાવરણ છતાં ભારતમાંથી જેમ અને જ્વેલરીની નિકાસમાં સતત વૃદ્ધિ જળવાઈ રહેવી તે સમગ્ર ઉદ્યોગ માટે અત્યંત પ્રોત્સાહક બાબત છે.