બાઈક હંકારતી વખતે બૂટ ફરજિયાત છે..’ કહી નકલી પોલીસ તોડ કર્યો!
જામ ખંભાળિયા નજીક હાઈવે પર મોટરસાયકલ લઈને જઈ રહેલા બે યુવાનોને રોકીને પોતે પોલીસ હોવાની ખોટી ઓળખ આપીને દંડના નામે રૂપિયા પડાવનાર એક નકલી પોલીસકર્મી પકડાઈ ગયો છે. લાયસન્સ, આરસી બૂક અને પીયુસી જેવા તમામ દસ્તાવેજો બતાવવા છતાં ‘ડ્રાઈવિંગ સમયે બૂટ પહેરવા ફરજિયાત છે..’ તેવું કહીને ખોટો ભય ઊભો કરનાર શખ્સ સામે પોલીસ દ્વારા કાયદેસરની કાર્યવાહી હાથ ધરવામાં આવી છે.
ઘટનાની મુખ્ય વિગતો:
-
બનાવની વિગત: ખંભાળિયાના સલાયા ગામે રહેતા આમદ સંઘાર અને તેમના સંબંધી ગત ૨ ઓક્ટોબરે મોટરસાયકલ પર ખંભાળિયાથી પરત જઈ રહ્યા હતા ત્યારે સલાયા હાઈવે પર સાદા કપડામાં ઉભેલા એક અજાણ્યા શખ્સે તેમને અટકાવ્યા હતા.
-
દંડનો ભય અને તોડ: યુવાનોએ ડ્રાઇવિંગ લાયસન્સ અને વાહનના કાગળો બતાવવા છતાં આરોપીએ ‘હેલ્મેટ પહેર્યું નથી અને ડ્રાઇવિંગ કરતી વખતે બૂટ પહેરવા ફરજિયાત છે’ તેમ કહી રૂા. ૫,૦૦૦નો દંડ અથવા કેસ કરવાની ધમકી આપી હતી. અંતે દબાણ કરીને રૂા. ૫૦૦ બળજબરીપૂર્વક પડાવી લીધા હતા અને પાવતી માંગતા ધમકી આપી નાસી છૂટ્યો હતો.
-
નકલી પોલીસનો પર્દાફાશ: આ મામલે ભોગ બનનાર યુવાને પોલીસમાં ફરિયાદ નોંધાવ્યા બાદ તપાસ કરતા આ શખ્સ નકલી હોવાનું સામે આવ્યું હતું. સીસીટીવી ફૂટેજના આધારે પોલીસે તપાસ કરતા આ શખ્સ વડત્રા ગામનો શક્તિસિંહ પ્રતાપસિંહ જાડેજા હોવાનું ખુલ્યું હતું, જે અગાઉ જીઆરડી જવાન તરીકે પણ ફરજ બજાવી ચૂક્યો છે. પોલીસે તેને સકંજામાં લઈ વધુ પૂછતાછ શરૂ કરી છે.
ટ્રાફિક નિયમો અંગે મહત્ત્વની સ્પષ્ટતા:
આ મામલે પીઆઈ સી.આર. રાણાએ સ્પષ્ટતા કરતા જણાવ્યું છે કે, મોટર વ્હીકલ્સ એક્ટમાં સામાન્ય દ્વિચક્રી (બાઈક-સ્કૂટર) વાહનચાલક માટે બૂટ કે ચોક્કસ પ્રકારના શૂઝ પહેરવા ફરજિયાત હોવાની કે તેના પર દંડ થવાની કોઈ જ જોગવાઈ નથી. વાહન હંકારતી વખતે હેલ્મેટ પહેરવું અનિવાર્ય છે, પરંતુ ‘બૂટ ફરજિયાત છે’ તેવી માન્યતા માત્ર લોકોમાં એક ગેરસમજ છે. જો કે, સુરક્ષાની દ્રષ્ટિએ વાહન ચલાવતી વખતે શૂઝ પહેરવા હિતાવહ છે.
