સુરત મહાનગરપાલિકા (SMC) ના ફૂડ વિભાગ દ્વારા નાગરિકોના સ્વાસ્થ્યની સુરક્ષા અર્થે શહેરભરમાં વ્યાપક મેગા ઓપરેશન હાથ ધરવામાં આવ્યું છે. છેલ્લા પાંચ દિવસથી સતત ચાલતી આ ઝુંબેશ અંતર્ગત ખાદ્યપદાર્થોનું વેચાણ કરતી હોટલો, રેસ્ટોરન્ટો અને ઢાબાઓ પર સઘન તપાસ કરવામાં આવી રહી છે, જેનાથી વાસી અને અસ્વચ્છ ખોરાક પીરસતા વેપારીઓમાં ભારે ફફડાટ વ્યાપી ગયો છે.
610 થી વધુ હોટલ-રેસ્ટોરન્ટમાં સરપ્રાઇઝ ચેકિંગ
SMC ના ફૂડ સેફ્ટી ઓફિસર હિતેશ પટેલ અને તેમની ટીમ દ્વારા શહેરના તમામ ઝોનમાં દરોડા પાડવામાં આવ્યા હતા. મેગા ઓપરેશનના પાંચમા દિવસે 610 થી વધુ હોટલ, રેસ્ટોરન્ટ અને ઢાબાઓમાં સરપ્રાઇઝ ચેકિંગ કરીને કિચનની સ્વચ્છતા, સ્ટોરેજ અને ખાદ્યપદાર્થોની ગુણવત્તાનું બારીકાઈથી નિરીક્ષણ કરવામાં આવ્યું હતું.
કડક કાર્યવાહી અને દંડનીય પગલાં
-
7 હોટલ-રેસ્ટોરન્ટ સીલ: અતિશય અસ્વાસ્થ્યપ્રદ અને અસ્વચ્છ પરિસ્થિતિમાં ચાલતી 7 સંસ્થાઓને ઘટનાસ્થળે જ સીલ કરી બંધ કરાવવામાં આવી છે.
-
149 ને નોટિસ: સ્વચ્છતા અને કાયદાકીય નિયમોનું પાલન ન કરતી 149 સંસ્થાઓને કારણ દર્શક નોટિસ ફટકારાઈ છે.
-
750 કિલો વાસી ખોરાકનો નાશ: ચેકિંગ દરમિયાન મળી આવેલો આશરે 750 કિલો વાસી અને અખાદ્ય ખોરાકનો સ્થળ પર જ નાશ કરાયો હતો.
-
₹4.95 લાખનો દંડ: ખાદ્ય સુરક્ષાના નિયમોનો ભંગ કરવા બદલ તંત્ર દ્વારા કુલ રૂ. 4.95 લાખનો દંડ વસૂલ કરવામાં આવ્યો છે.
