વડોદરા:
સંસ્કારી નગરી વડોદરામાં ડ્રગ્સના દૂષણ સામે ઝુંબેશ ચલાવતી એક યુવતીનો સોશિયલ મીડિયા વીડિયો ભારે વાયરલ થયો છે. વીડિયોમાં યુવતીએ દાવો કર્યો છે કે શહેરના ફતેગંજ, નવાયાર્ડ અને જેતલપુર બ્રિજ જેવા વિસ્તારોમાં ડ્રગ્સ સરળતાથી મળી રહે છે. તેણે ફતેગંજ વિસ્તારનો ખાસ ઉલ્લેખ કરતાં જણાવ્યું કે, માત્ર ₹200 લઈને જાઓ એટલે ડ્રગ્સ ઉપલબ્ધ થઈ જાય છે. યુવતીએ અમુક ડ્રગ પેડલરોના નામો પણ જાહેર કર્યા છે.
યુવતીએ સવાલ ઉઠાવ્યો હતો કે જો સામાન્ય નાગરિક સુધી ડ્રગ્સ વેચાણની આટલી સચોટ માહિતી પહોંચી શકતી હોય, તો પોલીસ તંત્ર આનાથી અજાણ કેવી રીતે હોઈ શકે? તેણે વડોદરામાં ડ્રગ્સ સામે કડકમાં કડક કાર્યવાહી કરવાની માંગ કરી છે.
ઘટનાના મુખ્ય મુદ્દાઓ:
-
ડ્રગ્સના અડ્ડાઓનો ખુલાસો: વાયરલ વીડિયોમાં યુવતીએ ફતેગંજ, નવાયાર્ડ અને જેતલપુર બ્રિજ જેવા હોટસ્પોટ અને સ્થાનિક પેડલરોના નામ આપ્યા છે.
-
પોલીસનું સ્પષ્ટીકરણ: આ મામલે વડોદરા પોલીસે જણાવ્યું છે કે યુવતી દ્વારા તેમની પાસે કોઈ સીધી લેખિત કે મૌખિક ફરિયાદ આવી નથી.
-
ઝીરો ટોલરન્સ નીતિ: પોલીસે દાવો કર્યો છે કે શહેરને નશા મુક્ત રાખવા માટે ‘ઝીરો ટોલરન્સ’ નીતિ અપનાવવામાં આવી છે અને વીડિયોમાં જણાવેલા વિસ્તારોમાં વોચ ગોઠવીને તપાસ હાથ ધરવામાં આવી રહી છે.
