હોટેલ-રેસ્ટોરાં, કેટરિંગ અને ફૂડ બિઝનેસને રાહત; ઘરેલુ LPGના ભાવ યથાવત
નવી દિલ્હી: તહેવારોની સિઝન પહેલાં કેન્દ્ર સરકારે વેપારી વર્ગને મોટી રાહત આપી છે. ઓઈલ માર્કેટિંગ કંપનીઓએ 19 કિલોના કોમર્શિયલ LPG સિલિન્ડરના ભાવમાં રૂ. 202થી રૂ. 209 સુધીનો ઘટાડો જાહેર કર્યો છે. નવા દર આજથી અમલમાં આવ્યા છે, જેના કારણે હોટેલ, રેસ્ટોરાં, કેટરિંગ સેવા, ફૂડ વેન્ડરો અને અન્ય વ્યાવસાયિક વપરાશકર્તાઓને સીધો લાભ મળશે.
નવી કિંમતો મુજબ દિલ્હીમાં 19 કિલોનો કોમર્શિયલ સિલિન્ડર રૂ. 202 સસ્તો થઈ રૂ. 2,879.50માં, જ્યારે કોલકાતામાં રૂ. 209ના ઘટાડા બાદ રૂ. 2,872.50માં ઉપલબ્ધ રહેશે. અન્ય શહેરોમાં પણ સમાન દરે ઘટાડો કરવામાં આવ્યો છે.
સરકારે સ્પષ્ટ કર્યું છે કે 14.2 કિલોના ઘરેલુ LPG સિલિન્ડરના ભાવમાં કોઈ ફેરફાર કરવામાં આવ્યો નથી. પેટ્રોલ, ડીઝલ અને અન્ય પેટ્રોલિયમ પેદાશોના ભાવ પણ હાલ યથાવત રાખવામાં આવ્યા છે.
ઉલ્લેખનીય છે કે, છેલ્લા એક મહિનામાં કોમર્શિયલ ગેસ સિલિન્ડરના ભાવમાં આ સતત બીજી વખત ઘટાડો કરવામાં આવ્યો છે અને ચાલુ વર્ષનો આ સૌથી મોટો ઘટાડો માનવામાં આવે છે.
શ્રાવણ માસ, જન્માષ્ટમી સહિતના તહેવારોની શરૂઆત સાથે વેપાર-ધંધામાં વધારો થવાનો હોવાથી આ નિર્ણય હોટેલ ઉદ્યોગ, નાના વેપારીઓ અને ફૂડ સર્વિસ સેક્ટર માટે નોંધપાત્ર રાહતરૂપ સાબિત થશે.
