1,152 પેટી વિદેશી દારૂ સાથે આઇસર ટ્રક કબજે; ₹69 લાખના દારૂનો જથ્થો જપ્ત, ચાલક પોલીસને જોઈ ફરાર
વડોદરા: ગેરકાયદેસર દારૂની હેરાફેરી સામે વડોદરા લોકલ ક્રાઇમ બ્રાન્ચ (LCB)એ વધુ એક મોટી સફળતા મેળવી છે. દિલ્હી-મુંબઈ એક્સપ્રેસ હાઈવે પર ચોક્કસ બાતમીના આધારે હાથ ધરાયેલી કાર્યવાહીમાં પોલીસે 1,152 પેટી વિદેશી દારૂથી ભરેલો આઇસર ટ્રક ઝડપી પાડી કુલ ₹84 લાખનો મુદ્દામાલ કબજે કર્યો છે. જોકે ટ્રકનો ચાલક પોલીસને જોઈ વાહન મૂકીને ફરાર થઈ ગયો હતો.
LCBની ટીમે પૂર્વ આયોજન સાથે એક્સપ્રેસ હાઈવે પર વોચ ગોઠવી હતી. શંકાસ્પદ ટ્રકને અટકાવવાનો પ્રયાસ કરતાં ચાલકે ટ્રક રસ્તા પર જ છોડી ભાગી છૂટ્યો હતો. પોલીસે ટ્રકની તપાસ કરતાં અંદરથી ₹69 લાખની કિંમતનો ભારતીય બનાવટનો વિદેશી દારૂ મળી આવ્યો હતો.
દારૂનો જથ્થો, આઇસર ટ્રક અને અન્ય મુદ્દામાલ સહિત કુલ ₹84 લાખની કિંમતનો માલ કબજે કરીને પોલીસે કાયદેસરની કાર્યવાહી હાથ ધરી છે.
આ સમગ્ર મામલે ભાદરવા પોલીસે પ્રોહિબિશન એક્ટ હેઠળ ગુનો નોંધી ફરાર ચાલક તેમજ દારૂની હેરાફેરીના સમગ્ર નેટવર્ક સુધી પહોંચવા તપાસ શરૂ કરી છે. દારૂનો જથ્થો ક્યાંથી લાવવામાં આવ્યો હતો, કોના માટે લઈ જવાઈ રહ્યો હતો અને આ રેકેટમાં અન્ય કોણ-કોણ સંડોવાયેલા છે તે અંગે પણ તપાસ ચાલી રહી છે.
રાજ્યમાં ગેરકાયદેસર દારૂના વેપાર સામે ચાલી રહેલા અભિયાનમાં વડોદરા LCBની આ કાર્યવાહી મહત્વપૂર્ણ માનવામાં આવી રહી છે. પોલીસને આશા છે કે આ કેસની તપાસ દરમિયાન હેરાફેરીના મોટા નેટવર્કનો પણ પર્દાફાશ થઈ શકે છે.
