‘મેક ઇન ઇન્ડિયા’ને મળશે નવી ગતિ, ભારતીય કંપનીઓ સાથે ઉત્પાદન માટે ચાલી રહી છે ચર્ચા
નવી દિલ્હી: ભારતના સંરક્ષણ ક્ષેત્ર માટે એક મહત્વપૂર્ણ વિકાસ સામે આવ્યો છે. ઇઝરાયલની અગ્રણી સંરક્ષણ કંપની રાફેલ એડવાન્સ્ડ ડિફેન્સ સિસ્ટમ્સ ભારતમાં આયર્ન ડોમ ઇન્ટરસેપ્ટર મિસાઇલોના ઉત્પાદન માટે સ્થાનિક ભાગીદારો સાથે ચર્ચા કરી રહી છે. યોજના સાકાર થશે તો ઇઝરાયલ અને અમેરિકા બાદ ભારત આ અત્યાધુનિક મિસાઇલ સિસ્ટમનું ઉત્પાદન કરનાર વિશ્વનો ત્રીજો દેશ બનશે.
ભારત સરકારના ‘મેક ઇન ઇન્ડિયા’ અને ‘આત્મનિર્ભર ભારત’ અભિયાનને અનુરૂપ આ પહેલ દેશના સંરક્ષણ ઉત્પાદન ક્ષેત્ર માટે મહત્વપૂર્ણ માનવામાં આવી રહી છે. સ્થાનિક સ્તરે ઉત્પાદન શરૂ થતાં ભારતની સ્વદેશી સંરક્ષણ ક્ષમતા વધશે તેમજ આધુનિક ટેક્નોલોજીનું સ્થાનિકીકરણ પણ શક્ય બનશે.
રાફેલ હાલમાં ઉત્તર ઇઝરાયલમાં આયર્ન ડોમ ઇન્ટરસેપ્ટર મિસાઇલનું ઉત્પાદન કરે છે, જ્યારે અમેરિકામાં રેથિયોન સાથેની ભાગીદારી હેઠળ બીજી ઉત્પાદન લાઇન કાર્યરત છે. હવે ભારતમાં ત્રીજી ઉત્પાદન લાઇન સ્થાપવાની દિશામાં કામગીરી આગળ વધી રહી છે.
ભારતમાં ઉત્પાદન શરૂ થતાં મિસાઇલોના ઉત્પાદન ખર્ચમાં ઘટાડો થશે, વૈશ્વિક સપ્લાય ચેઇન વધુ મજબૂત બનશે અને વધતી આંતરરાષ્ટ્રીય માંગને ઝડપી રીતે પહોંચી વળવામાં મદદ મળશે. ઉપરાંત, ભારતીય સંરક્ષણ ઉદ્યોગને નવી ટેક્નોલોજી, રોકાણ અને રોજગારીનો પણ મોટો લાભ મળશે.
સૂત્રોના જણાવ્યા અનુસાર, ઉત્પાદન માટે અનેક ભારતીય સંરક્ષણ કંપનીઓ સાથે પ્રાથમિક સ્તરની ચર્ચા ચાલી રહી છે. આ યોજના અમલમાં આવ્યા બાદ ભારત માત્ર પોતાની જરૂરિયાતો પૂરી કરવામાં જ નહીં, પરંતુ ભવિષ્યમાં મિત્ર દેશોને આયર્ન ડોમ ઇન્ટરસેપ્ટર મિસાઇલની નિકાસ કરવા માટે પણ સક્ષમ બની શકે છે.
