રાજકોટ: રાજકોટ રૂરલ લોકલ ક્રાઇમ બ્રાન્ચ (LCB)એ દારૂની હેરાફેરી સામે મોટી કાર્યવાહી કરતાં પીઠડીયા ટોલનાકા નજીકથી ઇનોવા કારમાં સંતાડીને લઈ જવાતો રૂ.3.43 લાખનો વિદેશી દારૂ ઝડપી પાડ્યો છે. દરોડા દરમિયાન દારૂ, વાહનો સહિત કુલ રૂ.18.60 લાખનો મુદ્દામાલ જપ્ત કરવામાં આવ્યો છે. એક આરોપીની ધરપકડ કરવામાં આવી છે, જ્યારે બે શખ્સો ફરાર થતાં તેમની શોધખોળ શરૂ કરવામાં આવી છે.
પોલીસને ચોક્કસ બાતમી મળી હતી કે વિરપુરથી જેતપુર તરફ જતી એક ઇનોવા કારમાં વિદેશી દારૂનો મોટો જથ્થો લઈ જવાઈ રહ્યો છે અને તેની આગળ એક ક્રેટા કાર પાઇલોટિંગ કરી રહી છે. બાતમીના આધારે રૂરલ LCBના પીઆઈ જે.પી. રાવના માર્ગદર્શન હેઠળ ટીમે પીઠડીયા ગામ નજીક ખોડિયાર હોટલ પાસે વોચ ગોઠવી હતી.
પોલીસે ઇનોવા અને ક્રેટા કારને રોકવાનો પ્રયાસ કરતાં કારમાં સવાર શખ્સોએ ભાગવાનો પ્રયાસ કર્યો હતો. કાર્યવાહી દરમિયાન પોલીસે **પ્રિન્સ કુરજી પરમાર (રહે. ગોંડલ)**ને ઝડપી લીધો હતો, જ્યારે અન્ય બે આરોપીઓ સ્થળ પરથી ફરાર થઈ ગયા હતા.
તપાસ દરમિયાન ઇનોવા કારમાંથી વિદેશી દારૂની કુલ 1,309 બોટલો મળી આવી હતી. પોલીસે દારૂ, ઇનોવા કાર અને અન્ય મુદ્દામાલ સહિત કુલ રૂ.18.60 લાખની કિંમતનો જથ્થો જપ્ત કરીને કાયદેસરની કાર્યવાહી હાથ ધરી છે.
ફરાર આરોપીઓની ઓળખ વિશાલ ઉર્ફે નાનુ રમેશ સાકરીયા (રહે. બિલિયાડા, ગોંડલ) તથા ક્રેટા કારના ચાલક જોરુ મનુ પટગીર (રહે. નોલી, સાયલા) તરીકે થઈ છે. બંનેની ધરપકડ માટે પોલીસે અલગ-અલગ ટીમો બનાવી શોધખોળ શરૂ કરી છે.
પ્રાથમિક તપાસમાં આ દારૂની હેરાફેરી પાછળ મોટું નેટવર્ક હોવાની આશંકા વ્યક્ત કરવામાં આવી રહી છે. પોલીસે સમગ્ર સપ્લાય ચેઇન અને અન્ય સંડોવાયેલા શખ્સોની ભૂમિકા અંગે વધુ તપાસ શરૂ કરી છે.
