નખત્રાણા: પશ્ચિમ કચ્છ લોકલ ક્રાઈમ બ્રાન્ચ (LCB)એ નખત્રાણા તાલુકાના નાગલપર ગામની સીમમાં ચાલતા જુગારધામ પર દરોડો પાડી છ જુગારીઓને ઝડપી પાડ્યા છે. તળાવડી નજીક ચાલી રહેલી ગેરકાયદેસર જુગાર પ્રવૃત્તિ પર પોલીસે ચોક્કસ બાતમીના આધારે કાર્યવાહી હાથ ધરી હતી.
દરોડા દરમિયાન પોલીસે આરોપીઓ પાસેથી રૂ.1.86 લાખનો મુદ્દામાલ કબજે કર્યો છે. જપ્ત કરાયેલા મુદ્દામાલમાં રોકડ રકમ, મોબાઇલ ફોન, ટુ-વ્હીલર સહિત જુગારની પ્રવૃત્તિમાં ઉપયોગમાં લેવાયેલી અન્ય વસ્તુઓનો સમાવેશ થાય છે.
તમામ આરોપીઓ સામે સંબંધિત કાયદાકીય જોગવાઈઓ હેઠળ ગુનો નોંધી વધુ તપાસ શરૂ કરવામાં આવી છે. પોલીસે આ જુગારધામ સાથે અન્ય કોઈ વ્યક્તિ અથવા નેટવર્ક સંકળાયેલું છે કે નહીં તે દિશામાં પણ તપાસનો ધમધમાટ શરૂ કર્યો છે.
પશ્ચિમ કચ્છ LCB દ્વારા જિલ્લામાં ગેરકાયદેસર પ્રવૃત્તિઓ સામે સતત ચલાવવામાં આવતી ઝુંબેશના ભાગરૂપે આ કાર્યવાહી કરવામાં આવી હોવાનું પોલીસે જણાવ્યું છે.
