કુલ્લુ: હિમાચલ પ્રદેશની મણિકર્ણ ખીણના પ્રખ્યાત પર્યટન સ્થળ કસોલમાં એક વિદેશી મહિલાનું ડ્રગ્સના ઓવરડોઝથી મોત થવાનો ગંભીર મામલો સામે આવ્યો છે. પોલીસે મૃતક મહિલાની ઓળખ ૨૯ વર્ષીય રશિયન ડીજે આર્ટિસ્ટ દીશાલીન તરીકે કરી છે.
પોસ્ટમોર્ટમ રિપોર્ટમાં મોટો ખુલાસો કુલ્લુના એસપી મદન લાલ કૌશલે આ મામલાની પુષ્ટિ કરતા જણાવ્યું કે, પોલીસે વિદેશી મહિલાના મૃતદેહને કબજે કરી તેના પરિવારજનોને જાણ કરી હતી. પરિવારના સભ્યો ભારત આવ્યા બાદ મૃતદેહનું પોસ્ટમોર્ટમ કરવામાં આવ્યું હતું. પોસ્ટમોર્ટમ રિપોર્ટમાં ખુલાસો થયો છે કે મહિલાનું મોત ડ્રગ્સના અતિશય સેવન (ઓવરડોઝ)ના કારણે થયું છે. તે હોટલના રૂમમાંથી મૃત હાલતમાં મળી આવી હતી.
હાઈકોર્ટના આદેશોના લીરેલીરા, જંગલોમાં રેવ પાર્ટી મળતી માહિતી મુજબ, કસોલના જંગલોમાં ૭ થી ૧૧ જૂન દરમિયાન એક રેવ પાર્ટીનું આયોજન કરવામાં આવ્યું હતું. જેમાં દીશાલીન ડીજે વગાડવા આવી હતી. મણિકર્ણ ખીણમાં માનનીય હાઈકોર્ટના કડક પ્રતિબંધ હોવા છતાં, આજકાલ ખુલ્લેઆમ રેવ પાર્ટીઓ યોજાઈ રહી છે. સ્થાનિક પોલીસ અને વહીવટી તંત્રની નાક નીચે ચાલી રહેલી આ સીક્રેટ પાર્ટીઓમાં હજારોની સંખ્યામાં દેશી-વિદેશી પ્રવાસીઓ ઉમટી રહ્યા છે, જ્યાં નશો અને અશ્લીલતા પીરસવામાં આવી રહી છે.
ઇઝરાયેલ અને બેંગલુરુથી ચાલે છે આખું નેટવર્ક તપાસમાં સામે આવ્યું છે કે મણિકર્ણ ખીણમાં આ રેવ પાર્ટીઓનું નેટવર્ક ઇઝરાયેલ અને બેંગલુરુથી ઓપરેટ થાય છે. સોશિયલ મીડિયા અને ઓનલાઈન સાઈટ્સ દ્વારા આ પાર્ટીઓનું ગુપ્ત પ્રમોશન અને બુકિંગ કરવામાં આવે છે. જંગલોમાં મોડી રાત સુધી વાગતા લાઉડ સ્પીકરોના કારણે ધ્વનિ પ્રદૂષણ વધી રહ્યું છે. જેનાથી સ્થાનિક પર્યાવરણને પણ મોટું નુકસાન થઈ રહ્યું છે. રશિયન મહિલાના મોત બાદ પોલીસે કસોલમાં ગેરકાયદેસર રેવ પાર્ટીઓ અંગે બે અલગ-અલગ કેસ નોંધી તપાસ તેજ કરી છે.
