પશ્ચિમ બંગાળના નવા સીએમ શુભેન્દુ અધિકારી પાસે નથી કાર, ન ઘરમાં સોનું! સંપત્તિમાં માત્ર ₹12 હજાર રોકડા

પશ્ચિમ બંગાળના રાજકારણમાં આજે એક ઐતિહાસિક પ્રકરણ જોડાવા જઈ રહ્યું છે.ભારતીય જનતા પાર્ટી (BJP) ના દિગ્ગજ નેતા શુભેન્દુ અધિકારી આજે રાજ્યના મુખ્યમંત્રી તરીકે શપથ લેવા જઈ રહ્યા છે.પરંતુ આ શપથ ગ્રહણ સમારોહની વચ્ચે સૌથી વધુ ચર્ચા તેમના ભવ્ય રાજકીય કદની નહીં, પણ તેમની સંપત્તિની થઈ રહી છે.

શુભેન્દુ અધિકારી દ્વારા આપવામાં આવેલા સોગંદનામા મુજબ, બંગાળના નવા મુખિયા પાસે ન તો પોતાની કોઈ કાર છે અને ન તો રોકાણના નામે સોનું. તેમની કુલ જાહેર કરેલી રોકડ માત્ર ₹12,000 છે. તેમની કુલ જાહેર સંપત્તિ આશરે ₹85.87 લાખ છે..જેમાં ₹24.57 લાખની જંગમ સંપત્તિ અને ₹61.30 લાખની સ્થાવર સંપત્તિનો સમાવેશ થાય છે.

બેંક ખાતા અને રોકાણમાં કેટલી રકમ?

શુભેન્દુ અધિકારીના વિવિધ બેંકોમાં કુલ 14 ખાતા છે. જેમાં પંજાબ નેશનલ બેંક, SBI, એક્સિસ બેંક અને કેટલીક કો-ઓપરેટિવ બેંકો સામેલ છે. આ ખાતાઓમાં કુલ જમા રાશિ આશરે ₹7.34 લાખ બતાવવામાં આવી છે. આ ઉપરાંત તેમણે નેશનલ સેવિંગ સર્ટિફિકેટ (NSC), કિસાન વિકાસ પત્ર અને પોસ્ટ ઓફિસ સેવિંગ સ્કીમમાં પણ રોકાણ કર્યું છે. તેમના નામે LICની ઘણી પોલિસીઓ પણ છે.

જમીન અને ફ્લેટ પણ સામેલ

સ્થાવર સંપત્તિની વાત કરીએ તો, શુભેન્દુ અધિકારી પાસે પૂર્વી મેદિનીપુર જિલ્લામાં ખેતીની જમીન અને કેટલીક રહેણાંક મિલકતો છે.તેમણે નંદીગ્રામ સહિતના અનેક વિસ્તારોમાં ખેતીની જમીન જાહેર કરી છે. આ ઉપરાંત તમલુક અને કુમારપુરમાં ફ્લેટ અને પૈતૃક સંપત્તિ પણ તેમના નામે નોંધાયેલી છે. આ તમામ મિલકતોની કુલ કિંમત આશરે ₹61 લાખથી વધુ હોવાનું જણાવાયું છે.

મમતા બેનર્જીને હરાવીને બન્યા ‘જાયન્ટ કિલર’

શુભેન્દુ અધિકારીએ 2026ની વિધાનસભા ચૂંટણીમાં મોટો રાજકીય ઉલટફેર કરતા TMC પ્રમુખ મમતા બેનર્જીને હરાવ્યા હતા. ક્યારેક મમતા બેનર્જીના નજીકના ગણાતા શુભેન્દુ 2020માં ભાજપમાં જોડાયા હતા. આ ચૂંટણીમાં ભાજપે 294 બેઠકોમાંથી 207 બેઠકો જીતીને ઇતિહાસ રચી દીધો છે.

કોઈ દેવું નથી

સોગંદનામા મુજબ, શુભેન્દુ અધિકારી પર કોઈ પણ પ્રકારની બેંક લોન કે સરકારી લેણું બાકી નથી. નાણાકીય વર્ષ 2024-25માં તેમની કુલ આવક આશરે ₹17.38 લાખ રહી હતી. તેમની આવકના સ્ત્રોત તરીકે ધારાસભ્યનો પગાર, સાંસદ પેન્શન અને વ્યવસાય દર્શાવવામાં આવ્યા છે.