વડાપ્રધાન નરેન્દ્ર મોદીએ દિલ્હી સ્થિત પોતાના નિવાસસ્થાને કોમનવેલ્થ ગેમ્સ 2026માં મેડલ જીતનાર ભારતીય ખેલાડીઓ સાથે ખાસ મુલાકાત કરી હતી. આ મુલાકાત દરમિયાન હેવીવેઈટ બોક્સર અને સિલ્વર મેડલિસ્ટ નરેન્દર બેરવાલે પાકિસ્તાની બોક્સર સાથે જોડાયેલો એક રસપ્રદ કિસ્સો સંભળાવ્યો હતો, જેને સાંભળીને વડાપ્રધાન મોદી ખુદ હસી પડ્યા હતા.
મિલિટ્રી ગેમ્સમાં પાકિસ્તાની બોક્સર સાથે ફાઈટ
નરેન્દર બેરવાલે સંભળાવ્યું કે, 2015 વર્લ્ડ મિલિટ્રી ગેમ્સમાં તેમની પહેલી ફાઈટ પાકિસ્તાનના બોક્સર સામે હતી. મેચ પહેલાં જ ભારતીય આર્મી તરફથી તેમને કડક સૂચના અપાઈ હતી કે ‘પાકિસ્તાન સામે કોઈ પણ સંજોગોમાં હારવાનું નથી.’
મેચ અને ઈજાનો કિસ્સો
-
મેચનું પરિણામ: નરેન્દરે પહેલો રાઉન્ડ 4-1 થી અને બીજો રાઉન્ડ 3-2 થી જીતી લીધો હતો.
-
ઈજા: મેચ દરમિયાન બંને ખેલાડીઓના માથા અથડાતા ઈજા થઈ હતી અને મેચ બાદ બંનેને ટાંકા લેવડાવવા માટે હોસ્પિટલ જવું પડ્યું હતું.
પાકિસ્તાની બોક્સરે કહ્યું: ‘મને નરેન્દ્ર નામથી નફરત છે’
હોસ્પિટલમાં સારવાર દરમિયાન થયેલી વાતચીતનો કિસ્સો શેર કરતા નરેન્દરે જણાવ્યું કે:
-
ભારતીય આર્મીના કોચનું નામ પણ નરેન્દ્ર રાણા હતું.
-
પાકિસ્તાની બોક્સરે ખૂબ વિચાર્યા પછી કહ્યું: “ભાઈજાન, તમારું નામ નરેન્દ્ર છે, તમારા કોચનું નામ નરેન્દ્ર છે, અને તમારા વડાપ્રધાનનું નામ પણ નરેન્દ્ર છે… મને તો હવે નરેન્દ્ર નામથી જ નફરત થઈ ગઈ છે!”
બોક્સર નરેન્દર બેરવાલ વિશે
નરેન્દર બેરવાલ ભારતીય સેના સાથે જોડાયેલા બોક્સર છે અને 90 કિલોગ્રામથી વધુ ભાર વર્ગમાં ભારતનું પ્રતિનિધિત્વ કરે છે. તેઓ એશિયન ગેમ્સમાં પણ મેડલ જીતી ચૂક્યા છે અને 2026 કોમનવેલ્થ ગેમ્સમાં સિલ્વર મેડલ મેળવી દેશનું નામ રોશન કર્યું છે.
